بولیویا :  سابق صدر کو دس برس قید کی سزا سنا دی گئی

غیر ملکی میڈیا کے مطابق جنوبی امریکی ملک بولیویا کی ایک عدالت نے گزشتہ روز اپنے ایک اہم فیصلے میں ملک کی سابق صدر جینینے اینّز چاویز کو سال  2019 میں بغاوت کرنے کا قصوروار ٹھہرا تے ہوئے انہیں دس برس قید کی سزا سنا دی۔

54 سالہ سابق صدر کو آئین کے خلاف فیصلے  کرنے اور اپنے فرائض سے غفلت برتنے  کا مجرم قرار دیا گیا ہے ۔ عدالت کاکہنا تھا کہ  محترمہ انیّز نے سال  2019 کے صدارتی انتخابات کے بعد ان ملکی اصولوں کی خلاف ورزی کی، جو آئین اور جمہوری نظام کی ضمانت دیتے ہیں۔

سابق صدر انیّز مارچ 2021 میں دہشت گردی ، بغاوت اور سازش جیسے الزامات  کے باعث جیل میں  ہیں اور انہیں مقدمے کی سماعت کے دوران عدالتی کارروائی میں ذاتی طور پر شرکت کی بھی  اجازت نہیں دی گئی اور وہ جیل سے ہی مقدمے کی پیروی کرتی رہیں  ۔ 

2019 کے صدارتی انتخابات کے بعد جینین انیّز ملکی پارلیمنٹ کی سب سے سینیئر رکن تھیں اور  صدر ایوو موریلس کے مستعفی ہونے کے بعد انہوں نے صدارت کا عہدہ سنبھالا تھا ۔

سابق صدر موریلس نے  تقریباً 14 برس تک بولیویا پر حکمرانی کی تھی  اور اکتوبر 2019 میں متنازعہ انتخابی نتائج کے بعد فوج اور عوام کے دباؤ کے تحت انہوں نے اپنے عہدے سے استعفیٰ دے دیا تھا۔