پاکستان نے جنوبی افریقہ کو پہلے ٹیسٹ میں 7وکٹوں شکست دے دی

نیشنل سٹیڈیم کراچی میں کھیلے گئے پاکستان اور جنوبی افریقہ کے درمیان پہلے ٹیسٹ میچ میں چوتھے دن کے کھیل کا آغاز تباہ کن انداز میں ہوا اور ابتداء میں ہی جنوبی افریقہ کی دو قیمتی وکٹیں حسن علی اور یاسر شاہ نے جلد حاصل کرکے میچ میں پاکستان کی گرفت مزید مضبوط کردی۔پروٹیز کپتان ڈی کوک بھی زیادہ دیر وکٹ پر نہ ٹھہر سکے اور 2 رنز بنا کر یاسر شاہ کا شکار بنے۔جنوبی افریقہ کے آخری 4 کھلاڑیوں کو ٹیسٹ ڈیبیو کرنیوالے لیفٹ آرم اسپنر نعمان علی نے آؤٹ کیا۔

ساتویں وکٹ 234 کے اسکور پر گری جب جارج لین 11 رنز بنا کر آؤٹ ہوئے، آٹھویں وکٹ 238 پر گری جب ربادا ایک رن بنا کر بولڈ ہوئے۔جنوبی افریقا کی نویں وکٹ نورٹج کی تھی وہ بغیر کوئی رن بنائے آؤٹ ہوئے جبکہ آخری آؤٹ ہونے والے کھلاڑی بامووا تھے جو 40 رنز بنا سکے۔پاکستان کی جانب سے ڈیبیو ٹیسٹ کھیلنے والے لیفٹ آرم اسپنر نعمان علی نے دوسری اننگز میں 5 کھلاڑیوں کو آؤٹ کیا، جبکہ یاسر شاہ نے 4اور حسن علی نے ایک وکٹ حاصل کی۔

جواب میں قومی ٹیم نے 88 رنز کا آسان ہدف 3 وکٹوں کے نقصان پر حاصل کر لیا ۔ قومی ٹیم کی جانب سے اوپنرر عمران بٹ نے 12 اور عابد علی نے 10 رنز بنا کر آوٹ ہوئے ، تیسری وکٹ کپتان بابر اعظم کی گری جو 30 رنز بنا کر آؤٹ ہوئے ، تاہم اظہر علی31 اور فواد عالم 4 رنز کے ساتھ ناٹ آؤٹ رہے۔

واضح رہے کہ 14سال بعد پاکستان کے دورے پر آئی جنوبی افریقی ٹیم نے ٹاس جیت کر پہلے بیٹنگ کا فیصلہ کیا تھا اور پوری ٹیم 220 رنز ہر آؤٹ ہو گئی تھی۔جواب میں 27 رنز پر 4 وکٹیں گنوانے کے باوجود پاکستان کی ٹیم پہلی اننگز میں 378 رنز بنا ئے تھے، فواد عالم نے سنچری جبکہ اظہر علی اور فہیم اشرف نے نصف سنچریاں اسکور کی تھیں۔