فلپائن میں 7.1 شدت کا زلزلہ 

غیر ملکی خبر رساں ادارے کے مطابق شمالی فلپائن زلزلے سے لرز اٹھا ،  فرانسیسی خبر رساں ادارے نے امریکی جیالوجیکل سروے کے حوالے سے بتایا کہ زلزلے کی شدت سے عمارتوں کی کھڑکیوں کے شیشے ٹوٹ گئے ۔

 زلزلے کا مرکز دارالحکومت منیلا سے 300 کلومیٹر(185میل) دور تھا جہاں پر بلند و بالا ٹاوربھی لرز گیا۔

 دارالحکومت منیلا ،لوزون کے مرکزی جزیرے اور ہلکی آبادی والے صوبے ابرا میں بدھ کی صبح 8بجکر 43منٹ پر ابتدائی طور پر 6.8 درجے شدت کے زلزلے کے جھٹکے محسوس کیے گئے۔

میڈیا رپورٹس کے مطابق  ڈولورس کے علاقے میں زلزلے سے عمارتوں میں دراڑیں پڑ گئیں ، شیشے ٹوٹ گئے اور خوفزدہ لوگ مکانوں سے باہر سٹرکوں پر نکل آئے۔

سوشل میڈیا  پر پوسٹ کی گئی ایک ویڈیو میں  قریبی قصبے بنگویڈ میں سفالٹ روڈ اور گرائونڈ میں دراڑیں پڑ گئیں، تاہم دکانوں یا مکانات کو کوئی نقصان نہیں پہنچا۔

پولیس چیف  کا  کہنا ہے کہ بنگویڈ میں متعدد افراد زخمی ہوئے جنہیں علاج کے لیے ہسپتال منتقل کر دیا گیا۔ حکام کی جانب سے ہلاکتوں میں اضافے کا خدشہ ظاہر کیا جارہا ہے۔ 

حکام نے کہا کہ فلپائن میں آج  آنے والا زلزلہ گزشتہ برسوں کے دوران سب سے شدید تھا۔ 

واضح رہے کہ اکتوبر 2013 میں وسطی فلپائن کے بوہول جزیرے میں 7.1 شدت کے زلزلے اور لینڈ سلائیڈنگ  سے 200 سے زیادہ افراد ہلاک ہوگئے تھے۔