پی ٹی آئی پر ممنوعہ فنڈنگ کا الزام ثابت ، الیکشن کمیشن کا بڑا فیصلہ آگیا

الیکشن کمیشن کے تین رکنی بینچ نے کیس کی سماعت کی ،  الیکشن کمیشن آف پاکستان نے پاکستان تحریک انصاف (پی ٹی آئی) کی ممنوعہ فنڈنگ کیس کا فیصلہ سناتے ہوئے کہا ہے کہ پی ٹی آئی نے ممنوعہ فنڈز لیے ہیں۔ پی ٹی آئی نے سولہ اکاؤنٹ کو ڈیکلیئر نہیں کیا ہے ۔

چیف الیکشن کمشنر کی سربراہی میں تین رکنی بینچ نے اپنے متفقہ فیصلے میں کہا ہے کہ ’پی ٹی آئی کو عطیات ممنوعہ ذرائع سے ملے ۔ امریکہ برطانیہ یو اے ای اور آسٹریلیا کی کمپنیوں اور افراد سے ملنے والے فنڈز ممنوعہ تھے۔‘

فیصلے کے مطابق ’پی ٹی آئی نے صرف آٹھ اکاؤنٹس کو تسلیم کیا جبکہ سٹیٹ بینک کے مطابق 13 اکاؤنٹس پی ٹی ائی کے تھے۔ پی ٹی آئی نے مجموعی طور 16 اکاؤنٹس چھپائے اور یہ الیکشن قوانین کی کھلم کھلا خلاف ورزی ہے۔

الیکشن کمیشن کا فنڈز ضبط کرنے کی کارروائی شروع کرنے کے لیے پی ٹی آئی کو شو کاز نوٹس جاری کرنے کا حکم دیا ہے۔

پاکستان تحریک انصاف (پی ٹی آئی) کی ممنوعہ فنڈنگ کیس کے فیصلے سے قبل الیکشن کمیشن اور ریڈ زون میں سکیورٹی کے غیر معمولی انتظامات کیے  گئے ہیں ۔

پی ٹی آئی ممنوعہ فنڈنگ کیس کا فیصلہ رواں سال 21 جون کو محفوظ کیا گیا تھا۔

الیکشن کمیشن میں تحریک انصاف ممنوعہ فنڈنگ کیس 2014 سے چل رہا تھا، کیس پی ٹی آئی کے بانی رکن اکبر ایس بابر نے دائر کیا تھا۔

درخواست گزار نے بیرون ملک سے پارٹی فنڈنگ میں بے قاعدگیوں کی نشاندہی کی تھی۔

ممنوعہ فنڈنگ کیس ہے کیا؟

2014   میں پاکستان تحریک انصاف (پی ٹی آئی)  کے منحرف رکن اکبر ایس بابر نے پارٹی کی اندرونی مالی بے ظابطگیوں کے خلاف الیکشن کمیشن میں درخواست دائر کی جس میں انہوں نے یہ الزام عائد کیا کہ پارٹی کو ممنوعہ ذرائع سے فنڈز موصول ہوئے اور مبینہ طور پر دو آف شور کمپنیوں کے ذریعے لاکھوں ملین ڈالرز ہنڈی کے ذریعے پارٹی کے بینک اکاونٹس میں منتقل کیے گئے۔

اس درخواست میں انہوں نے یہ بھی الزام عائد کیا کہ تحریک انصاف نے بیرون ملک سے فنڈز اکٹھا کرنے والے بینک اکاونٹس کو بھی الیکشن کمیشن سے خفیہ رکھا۔

پی ٹی آئی کو امریکہ، متحدہ عرب امارات ، برطانیہ ، یورپ ، آسٹریلیا ، کینڈا سے فنڈز موصول ہوئے ۔ الیکشن کمیشن نے سکروٹنی کمیٹی کی رپورٹ کے بعد دلائل مکمل ہونے پر 21 جون کو فیصلہ محفوظ کیا تھا۔