فیس بک نے اہم فیچر ختم کرنے کا اعلان کردیا 

سماجی رابطے کی ویب سائٹ فیس بک کی جانب سے بلاگ پوسٹ میں  مطلع کیا گیا ہے کہ صارفین یکم اکتوبر 2022 سے فیس بک  پر کسی بھی طرح کے نئے یا شیڈول لائیو شاپنگ ایونٹس کی میزبانی نہیں کرسکیں گے۔

فیس بک پر لائیو اسٹریم ویڈیو کا فیچر متعدد آزمائشوں کے بعد دو سال قبل عوامی سطح پر متعارف کرایا گیا تھا۔

سوشل میڈیا ایپ کاکہنا ہے کہ صارف لائیو ایونٹس کو اگرچہ نشر کرنے کے لیے فیس بک لائیو کا استعمال کرسکیں گے لیکن وہ فیس بک لائیو ویڈیوز میں پروڈکٹ پلے لسٹس بنانے یا پرڈکٹس ٹیگ نہیں کرسکیں گے۔

یہ فیچر تخلیق کاروں اور برینڈز کو سامان فروخت کرنے، ناظرین اور ممکنہ طور پر نئے صارفین سے جڑنے کا راستہ فراہم کرنے کے لیے ڈیزائن کیا گیا تھا۔

فیس بک کے مطابق کیونکہ  مختصر دورانیے کی ویڈیو ز صارفین  کی توجہ زیادہ تیزی سے حاصل کررہی ہیں اسی لیے   ہم بھی فیس بک اور انسٹاگرام پر اپنی توجہ ریلز پر مرکوز کر رہے ہیں۔

واضح رہے کہ ریلز فیس بک کی پیرنٹ کمپنی میٹا کی مختصر دورانیے کی ویڈیو پروڈکٹ ہے۔ 

مبصرین کا ماننا ہے کہ  فیس بک چین کی ویڈیو ایپ ’ٹک ٹاک‘ کا مقابلہ کرنے کے لیے ریلز پر زیادہ کام کر رہا ہے ۔ 

فیس بک   کمپنی کا کہنا ہے کہ اگر صارفین ویڈیو کے ذریعے لوگوں تک پہنچنا اور انہیں متوجہ کرنا چاہتے ہیں تو فیس بک اور انسٹاگرام پر ریلز اور ریلز ایڈز کے ساتھ تجربے کی کوشش کرسکتے ہیں۔

فیس بک  کے مطابق اگر آپ اپنی پرانی لائیو ویڈیو کو محفوظ کرنا چاہتے ہیں تو آپ سے اپنے پیج یا کریئیٹر اسٹوڈیو سے اسے ڈاؤن لوڈ بھی  کرسکتے ہیں۔