موٹروے ایم 5: بس اور آئل ٹینکر میں تصادم ، 20 افراد جاں بحق 

جی این این کے مطابق حادثے میں زخمی ہونیوالے 3 افراد کی حالت تشویش ناک ہے ، جبکہ  امدادی کارروائیاں جاری ہیں ۔  حادثہ لودھراں اور بہاولپور کے درمیان  موٹروے ایم فائیو پر پیش آیا اور موٹروے کا یہ حصہ کئی گھنٹے بند رہا ۔

موٹروے حکام کے مطابق ملتان سکھر موٹروے پر نجی  بس تیز رفتاری  یا ڈرائیور کو نیند آنے کے باعث  پیچھے سے  آئل ٹینکر سے ٹکرا گئی۔

ترجمان موٹروے پولیس کے مطابق تصادم کے نتیجے میں آئل ٹینکر اور بس کو آگ لگ گئی ، حادثے کی اطلاع ملتے ہی موٹروے پولیس کے افسران فوری موقع پر پہنچ گئے۔ مقامی پولیس اور ریسکیو 1122 کی ٹیمیں بھی موقع پر موجود تھیں۔

ترجمان کے مطابق آگ اس قدر شدید اور خوفناک تھی کہ دور سے د کھائی دے رہی تھی، امدادی ٹیموں نے بس کی باڈی کاٹ کر لاشوں اور زخمیوں کو نکالا جبکہ بس میں سوار 6افراد شیشے ٹوٹنے سے باہر نکلے۔

موٹروے پولیس نے جلتی بس سے 9 مسافروں کو باحفاظت نکال لیا تھا۔ پولیس نے لاشوں اور زخمیوں کو نزدیک کے اسپتال پہنچایا۔ امدادی ٹیموں کو آگ بجھانے میں کئی گھنٹے لگے۔ ہنگامی کارروائی کے دوران ڈی آئی جی شاہد جواد موقع پر موجود تھے۔

ڈپٹی کمشنر کے مطابق حادتے کے شدید زخمیوں کو نشتر ہسپتال منتقل کیا جارہا ہے جبکہ نشتر ہسپتال اور جلالپور کے طبی مراکز پر ایمرجنسی نافذ کردی گئی ہے۔

رپورٹس کے مطابق حادثے کا شکار ہونے والی بس لاہور سے کراچی کیلئے رات 9 بجے روانہ ہوئی ۔ کمپنی ذرائع کے مطابق بس میں دو ڈرائیور سوار تھے۔ تمام اسٹاف نے سکھر میں تبدیل ہونا تھا۔ بس میں کل 24 مسافر سوار تھے۔ جن میں سے دو مسافروں نے حیدرآباد اترنا تھا جبکہ 22 مسافروں نے کراچی جانا تھا۔

وزیراعلیٰ پنجاب پرویز الہٰی نے ملتان موٹروے ایم فائیو پر ٹریفک حادثے میں ہلاکتوں پر اظہار افسوس کیا ہے جبکہ  سابق وزیر خارجہ مخدوم شاہ محمود قریشی نے بھی المناک حادثہ پر اظہار افسوس کرتے ہوئے  جاں بحق ہونے والے افراد  کے درجات کی بلندی اور زخمیوں کی جلد صحت یابی کیلئے دعا کی ۔