لاہور:پاک جنوبی افریقہ ٹی ٹوئنٹی سیریز کیلئے تیاریاں جاری

تفصیلات کے مطابق پاکستان اور جنوبی افریقہ  کے درمیان تین ٹی ٹوئنٹی میچز کی سیریز کا آغاز 11 فروری سے ہوگا،  سیریز کے لئے پاکستان ٹیم کا اعلان کل کیا جائے گا، اس  سلسلے میں  ضلعی انتظامیہ  نے  جشن بہاراں کی طرز پر انتظامات  مکمل کرنے کا فیصلہ کیا ہے ۔

لاہور میں ہونے والے میچز کے لیے تاریخی  قذافی اسٹیڈیم کی تزئین و آرائش آخری مرحلے میں ہے، قذافی اسٹیڈیم کے گرد نواح میں خصوصی لائٹس لگانے کا کام  پیر سے ہو گاجبکہ تین مختلف مقامات پر  پارکنگ کے انتظامات کیے جائیں  گے ۔ کنال میں ثقافتی ماڈلز بھی نصب کیے جائیں گے جبکہ پی سی ہوٹل سے  مسلم ٹاؤن تک  براستہ کنال روڈ پر   سرچ لائٹس لگائی جائیں گی۔ اس سلسلے میں پولیس ضلعی انتظامیہ، پی ایچ اے، واسا اور دیگر محکموں کی اہم  میٹنگ  طلب کر لی گئی  ہے ۔

خیال رہے کہ جنوبی افریقہ   پاکستان کیخلاف ٹی ٹوئنٹی سیریز کیلئے ٹیم کا اعلان کرچکی ہے ، ہینرک کلاسن کو کپتان مقرر کیا گیا ہے، اوکلے سیلے، ریان رکلیٹن اور جیکس اسنائیمین پہلی بار جنوبی افریقی اسکواڈ میں شامل کیے گئے ہیں۔ کوئنٹن ڈی کوک، بواما، این گیڈی اور ونڈر ڈیوسن سیریز نہیں کھیلیں گے۔

واضح رہے کہ ٹی ٹوئنٹی سیریز کے میچز11، 13 اور 14 فروری کو قذافی اسٹیڈیم میں ہوں گے۔