پاکستان میں فی تولہ سونا مزید 2000 روپے مہنگا ہوگیا

بین الاقوامی بلین مارکیٹ میں سونے کی فی اونس قیمت میں 13 ڈالر کی کمی ہوئی اور عالمی مارکیٹ میں سونے کی فی اونس قیمت 1702 ڈالر کی سطح پر پہنچ گئی۔

اس کے برعکس پاکستان میں جمعرات کے روز سونے کی فی تولہ اور دس گرام سونے کی قیمت میں بالترتیب 2000 روپے اور 1715 روپے کا اضافہ ہوگیا۔

قیمتوں میں اضافے کے نتیجے میں کراچی، حیدرآباد، ملتان، لاہور، راولپنڈی، اسلام آباد، پشاور اور کوئٹہ کی صرافہ مارکیٹوں میں سونے کی فی تولہ قیمت بڑھ کر ایک لاکھ 41 ہزار روپے ہوگئی، جب کہ دس گرام سونے کی قیمت اضافے کے بعد 1 لاکھ 20 ہزار 885 روپے پر پہنچ گئی۔

اس کے برعکس مقامی صرافہ مارکیٹوں میں چاندی فی تولہ قیمت 50 روپے کم ہوکر 1470 روپے اور دس گرام چاندی کی قیمت 42 روپے 87 پیسے کمی کے بعد 1260 روپے 28 پیسے ہوگئی۔