متاثرینِ سیلاب کی مدد میں کوئی سیاست نہیں کی جا رہی : وزیراعظم 

تفصیلات کے مطابق این ایف آر سی سی کے اجلاس سے خطاب کرتے ہوئے وزیرِ اعظم شہباز شریف نے بتایا کہ این ڈی ایم اے نے متاثرین میں رقوم تقسیم کی ہیں ،  سیلاب میں 1700 سے زائد افراد جاں بحق ہوئے ہیں ، زخمیوں کی بھی مالی امداد کی جا رہی ہے، متاثرینِ سیلاب میں 66 ارب روپے تقسیم ہو چکے ہیں ۔ سیلاب سے جاں بحق افراد کے لواحقین کو 10 لاکھ روپے فی کس دیے جا رہے ہیں، یہ رقم تمام متاثرہ خاندانوں تک پہنچائی جا رہی ہے۔

ان کا کہنا ہے کہ بیرونِ ملک سے آنے والی امداد این ڈی ایم اے کے ذریعے تقسیم کی گئی، 70 ارب روپے بینظیر انکم سپورٹ پروگرام کے تحت تقسیم ہونے ہیں۔

وزیرِاعظم شہباز شریف کا کہنا ہے کہ متاثرینِ سیلاب کو ضرورت کی تمام اشیاء فراہم کی گئیں، ان میں شفاف انداز سے رقوم اور امداد تقسیم کی گئی ، ابھی بھی متاثرہ علاقوں میں سیلاب کا پانی کھڑا ہے، جس سے بیماریاں پھیل رہی ہیں۔

انہوں  نے کہا کہ کے پی اور پنجاب حکومت اس پر سیاست نا کریں ، کے پی نے درخواست کے باوجود کہا کہ ہمیں شراکت نہیں چاہیئے،  یہ ہم سب کا سانجھا ملک ہے ، وفاق اکائیوں سے ملتی ہے، جو اشیاوفاقی حکومت نے خریدی وہ چاروں صوبوں میں تقسیم کی گئی ، دوست ممالک سے جو کچھ بھی آیا  وہ چاروں صوبوں میں تقسیم کیا گیا ، سردیوں میں چین سے ونٹر ٹینٹ آرہے ہیں۔

انہوں نے بتایا کہ  فصلوں کی بجائی پر مل کر کام کرنے جا رہے ہیں  ، سیلاب کے بعد خدشہ ہے کہ گندم کی پیداوار طلب سے کم ہو سکتی ہے، گندم کی طلب کو پورا کرنے کے لیے اقدامات کر رہے ہیں۔