ارشد شریف،اعظم سواتی اور وزیر آباد حملے پر انصاف ہو گا،فواد چوہدری

تحریک انصاف کے رہنما فواد چوہدری کا کہنا ہے کہ وزیر آباد سانحہ کا پرچہ درج نہیں ہو سکا کیونکہ ملک میں رول آف لاء نہیں،طاقتور گروہ ملک کے سیاسی اور عدالتی نظام کو یرغمال بنائے ہوئے ہے۔ فواد چوہدری نے سماجی رابطے کی ویب سائیٹ ٹویٹر پر کہا کہ جب ہمسایہ ملک پاکستان کیلئے کہتا ہے کہ ہمیں سمجھ نہیں آتی بات کس سے کرنی ہے تو ہمارے پاس کوئی جواب نہیں ہوتا۔ 

عوام اب عمران خان کی قیادت میں ایک منظم قوت ہیں،اداروں کو عوام کے حقوق ماننا ہوں گے اس معاملے کا حل ہونا ضروری ہے۔ انکا کہنا تھا کہ عوام یہ تسلیم نہیں کریں گے کہ ایک گروہ قانون سے بالاتر رہے،ارشد شریف،اعظم سواتی اور وزیر آباد حملہ ان معاملات میں انصاف ہو گا۔

دوسری جانب تحریک انصاف نے پنجاب پولیس کی ایف آئی آر کیخلاف عدالت جانے کا فیصلہ کر لیا۔ 

وزیر آباد سانحہ کا پرچہ درج نہیں ہو سکا کیونکہ ملک میں Rule of Law نہیں طاقتور گروہ ملک کے سیاسی اور عدالتی نظام کو یرغمال بنائے ہوئے ہے اس لئے جب نریندر مودی پاکستان کیلئے کہتا ہے کہ ہمیں سمجھ نہیں آتی بات کس سے کرنی ہے تو ہمارے پاس کوئ جواب نہیں ہوتا

— Ch Fawad Hussain (@fawadchaudhry) November 8, 2022

پاکستان تحریک انصاف کی جانب سے عمران خان پر وزیر آباد میں ہوئے حملے کی درج کی گئی ایف آئی آر مسترد کر دی گئی۔ تحریک انصاف نے مؤقف اختیار کیا ہے کہ عمران خان کی جانب سے نامزد افراد کو پولیس کے درج کیے گئے مقدمے میں ملزم نامزد نہیں کیا گیا،درج ایف آئی آر ہماری درخواست سے مطابقت بھی نہیں رکھتی۔ بتایا گیا کہ پی ٹی آئی نے پنجاب پولیس کی جانب سے درج کی گئی ایف آئی آر کیخلاف عدالت جانے کا فیصلہ کیا۔ 

جبکہ فواد چوہدری نے بھی درج ایف آئی آر پر ردعمل دیتے ہوئے کہا کہ ہمارے نامزد کردہ نام شامل نہ کیے گئے تو ایف آئی آر قبول نہیں۔تحریک انصاف اپنا مؤقف دے چکی،نامزد ناموں کے بغیر ایف آئی آر صرف کاغذ کا بے وقعت ٹکڑا ہو گی۔واضح رہے کہ پنجاب پولیس نے پاکستان تحریک انصاف کے سربراہ عمران خان پر وزیر آباد میں ہوئے حملے کا مقدمہ درج کر لیا گیا تھا۔