کراچی: موسمیات کے قریب دکان میں دھماکا، خاتون اور 2 بچے جاں بحق

تفصیلات کے مطابق  جاں بحق افرد گلستان جوہر بلاک 4 کی رہائشی ہیں، خاتون اپنے بچوں کے ساتھ بھائی کے گھر آئی تھیں جہاں  عمارت کی سیڑھیوں پر پہنچتے ہی دھماکہ ہوگیا۔واقعے کی اطلاع ملتے ہی پولیس اور امدادی ٹیمیں موقع پر پہنچ گئیں  ۔  ڈائریکٹر جناح ہسپتال  ڈاکٹر سیمی جمالی کے مطابق گلستان جوہر میں دھماکے کے نتیجے  میں جاں بحق ہونے والے دو بچوں اور ایک خاتون کی لاش جناح اسپتال منتقل کردی گئی ہے۔ جاں بحق بچوں کی شناخت فاطمہ اور عبداللّٰہ جبکہ خاتون کی شناخت سعدیہ کے نام سے ہوئی ہے۔

پولیس کے مطابق  دھماکے  میں 6 افراد زخمی ہیں اور 3  بیٹری، پیزا اور اسٹیٹ ایجنسی کی دکانوں  کو بھی شدید نقصان پہنچا ہے۔ پولیس کاکہنا ہے کہ  دھماکہ پیزا شاپ میں ہوا ہے  کیونکہ پیزا کی دکان میں سلنڈر موجود تھے ، تاہم  دھماکے کی نوعیت کا پتا لگانے کے لیے بم ڈسپوزل اسکواڈ کو طلب کرلیا گیا ہے جو یہ تعین کرے گا کہ دھماکا گیس لیکج  یا سلنڈراور بیٹریوں کی وجہ سے ہوا۔   ابتدائی طور پر یہ واقعہ حادثہ لگتا ہے جس میں دہشتگردی کے شواہد سامنے نہیں آ رہے۔ پولیس کی جانب سے واقعے کی تحقیقا ت  کی جارہی ہیں ۔