اوگرا کی تجویز پر پٹرولیم مصنوعات کی قیمتوں میں 15 روپے کمی کا امکان متوقع

مہنگائی کے ستائے عوام کیلئے قدرے ریلیف کی امید پیدا ہو گئی۔ پٹرولیم مصنوعات کی قیمتوں میں 15 روپے لٹر تک کمی کا امکان ہے۔

اوگرا نے آئندہ 15 روز کیلئے قیمتوں سے متعلق ورکنگ پیپر تیار کر لیا جس کے مطابق گزشتہ 15 دنوں میں عالمی مارکیٹ میں تیل کی قیمتوں میں کمی ریکارڈ کی گئی۔ برینٹ آئل مارکیٹ میں تیل کی قیمت کم ہو کر 76 ڈالر فی بیرل تک رہی جبکہ حکومت نے بھی عالمی مارکیٹ سے 76 ڈالر فی بیرل میں تیل خریدا جس کے باعث عوام کو ریلیف منتقل کیا جا سکتا ہے۔

اوگرا نے حکومت کو دو تجاویز دی ہیں۔ پہلی تجویز کے مطابق،پٹرول کی قیمت میں 12 روپے جبکہ ڈیزل کی قیمت میں 10 روپے فی لٹر تک کمی کی جا سکتی ہے۔ لائٹ ڈیزل 15 روپے اور مٹی کے تیل میں13 روپے فی لٹر تک کمی کی جا سکتی ہے۔ دوسری تجویز میں کہا گیا ہے کہ جی ایس ٹی کی شرح بڑھا کر قیمتیں برقرار رکھی جا سکتی ہیں کیونکہ اس وقت پٹرول اور ڈیزل پر جی ایس  ٹی کی شرح صفر ہے۔

تجویز کے مطابق، پٹرولیم لیوی 50 روپے فی لیٹر کی آخری حد تک بڑھائی جا چکی ہے۔ وزارت خزانہ وزیراعطم کی منظوری کے بعد حتمی فیصلہ کل کرے گی۔

دوسری جانب موسم سرما کے آغاز کے ساتھ ہی فرنس آئل کی طلب بھی کم ہو گئی جس کے نتیجے میں اٹک ریفائنری نے جزوی شٹ ڈاؤن کا اعلان کر دیا۔ اٹک ریفائنری کا مرکزی ڈسٹلیشن یونٹ لگ بھگ 8 روز کے لیے بند ہو گا جس کے نتیجے میں توانائی کے جاری بحران میں مزید شدت آجانے کا خدشہ ہے۔