مقبوضہ کشمیر میں بھارتی فوج کی مسجد پر بھاری ہتھیاروں سے فائرنگ پر پاکستان کا سخت درعمل

شوپیاں میں بھارتی فوج کی مسجد پر بھاری ہتھیاروں سے فائرنگ اور دستی بم حملہ پر ‏پاکستان نے سخت رد عمل دیتے ہوئے کہا ہے کہ  قابض بھارتی افواج کی جانب سے اس بہیمانہ حرکت کی شدید مذمت کرتے ہیں۔

ترجمان دفتر ‏خارجہ زاہد حفیظ چوہدری کا کہنا ہے کہ  نام نہاد گھیراو اور تلاشی آپریشن کے دوران بار بار ماورائے عدالت ہلاکتیں بھارتی ریاستی ‏دہشت گردی کا لازمی جزو ہے،مقبوضہ کشمیر کے عوام مسلسل ماورائے عدالت ہلاکتوں کا سامنا کر رہے ہیں،  بھارتی فورسز کا یہ رویہ اخلاقی دیوالیہ پن کا واضح ثبوت ہے۔

ترجمان دفتر خارجہ کا مزید کہنا تھا کہ   مقبوضہ علاقے میں عوام عقائد اور ثقافتی شناخت کو نشانہ بنانا بنیادی انسانی حقوق کی ‏واضح خلاف ورزی ہے، تاریخ گواہ ہے مقبوضہ کشمیر کے عوام پر مظالم اور ان کی عبادت گاہوں کو نشانہ بناکر ‏کشمیریوں کا حوصلہ پست نہیں کیا جاسکا، پاکستان کی حکومت اور عوام حق خودارادیت کی جدوجہد میں کشمیریوں کے ساتھ ہیں۔