محسن نقوی پر اعتراضات بلا جواز ہیں،وزیر دفاع خواجہ آصف

اسلام آباد: وزیر دفاع خواجہ آصف نے کہا ہے کہ محسن نقوی پر اعتراضات بلا جواز ہیں۔

 محسن نقوی نیب زدہ نہیں، انہوں نے کوئی غیر قانونی کام نہیں کیا، نگران وزیر اعلیٰ کی تقرری پر پرویز الٰہی بھی شور مچار ہے ہیں، اگر یہ عدالت میں جاتے ہیں تو یہ قانونی جنگ ہے۔

 تفصیلات کے مطابق وفاقی وزیر خواجہ آصف نے میڈیا سے گفتگوکرتے ہوئے کہا کہ اپوزیشن لیڈر بننا تھا تو پہلے ہی استعفے نہ دیتے اس وقت ہی بن جاتے ، پی ٹی آئی والے الیکشن کمیشن کو گالی دیتے ہیں اور ساتھ ہی اس سے انصاف مانگتے ہیں، پہلے جنرل باجوہ (ر) کے نام کی مالا جپتے تھے اور اب دیکھ لیں کیا کہتے ہیں۔

وزیر دفاع نے اپنے بیان میں عمران خان کے محسن رضا نقوی بارے بیان پر تنقید کرتے ہوئے کہا کہ تحریک انصاف نے ہمارے دیئے ہوئے ناموں پر اعتراض کیا، پی ٹی آئی نے جس بیورو کریٹ کا نام لیا اس نے خود ہی معذرت کرلی، کوئی بھی نارمل دماغ رکھنے والا انسان اس طرح کے فیصلے نہیں کرتا جس طرح عمران خان کرتا ہے،عمران خان کسی کا نہیں، نہ ملک کا ہے نہ اپنے محسن کاہے۔

شرم و حیا والی چیز عمران خان میں نہیں ، یہ ایک فیل پراجیکٹ ہے،عمران خان اپنے فیصلے واپس لینے میں ایک سیکنڈ بھی نہیں لگاتے ،عمران خان جب بھی ایم این اے بنا اس نے استعفیٰ دیا۔

الیکشن کمیشن نے آئینی و قانونی طریقے سے نگران وزیراعلیٰ کی تقرری کی،نگران وزیر اعلیٰ سے متعلق الیکشن کمیشن کے فیصلے کا خیر مقدم کرتے ہیں۔