پنجاب میں انتخابات کی تاریخ کیلئے الیکشن کمیشن نے گورنر کو خط لکھ دیا

واضح رہے کہ لاہور ہائیکورٹ نے الیکشن کمیشن کو 90 روز کے اندر انتخابات کرانے کا حکم دیا تھا۔ عدالت کا کہنا تھا کہ الیکشن کمیشن گورنر کیساتھ مل کر الیکشن کی تاریخ طے کرے۔ 

تفصیلات کے مطابق  لاہور ہائیکورٹ کے فیصلے کی روشنی میں  چیف الیکشن کمشنر سکندر سلطان راجہ کی زیر صدارت الیکشن کمیشن کا اہم ترین اجلاس ہوا ۔ جس میں  ممبران و سیکرٹری اور قانونی ٹیم شریک ہوئی۔الیکشن کمیشن کے حکام سر جوڑ کر بیٹھے اور مشاورت کے بعد حتمی فیصلہ کرلیا۔ 

الیکشن کمیشن  نے پنجاب میں انتخابات کی تاریخ طے کرنے کیلئے گورنر پنجاب سے خط لکھ کر رابطہ کیا ۔  ذرائع کے مطابق خط میں کہا گیا ہے کہ گورنر بلیغ الرحمان پنجاب کے الیکشن کی تاریخ طے کرنے کیلئے کل مناسب وقت دیں۔ذرائع کے مطابق گورنر پنجاب سے سیکرٹری الیکشن کمیشن کی سربراہی میں وفد ملاقات کرے گا۔الیکشن کمیشن کے وفد میں سیکرٹری ، اسپیشل سیکرٹری اور ڈی جی لا شریک ہوں گے۔