پاکستان فلم انڈسٹری کے سینئر ہدایتکار، فلمساز ایس سلیمان انتقال کر گئے

تفصیلات کے مطابق پاکستان فلم انڈسٹری کے معروف فلمساز اور ہدایتکار  ایس سلیمان شوگر  اور دل کے عارضے میں مبتلا تھے  اور گزشتہ ایک سال سے مختلف اوقات میں نجی اسپتال میں زیرعلاج  تھے  تاہم    وہ جانبر نہ ہوسکے ۔  ایس سلیمان نے  پسماندگان میں بیوہ، ایک بیٹی اور دو بیٹے چھوڑے ہیں۔

فلم ڈائریکٹر ایس سلیمان ماضی کے اداکار سنتوش کمار اور درپن کے چھوٹے بھائی تھے۔  بھارتی شہر حیدرآباد میں پیدا ہونے والے ایس سلیمان کی پہلی فلم ’گلفام‘ 1961 میں ریلیز ہوئی۔ ایس سلیمان نے 60 سے زائد فلموں کی ہدایت کاری کی، ان کی ہدایت کاری میں بننے والی فلموں میں بہاروں کی منزل ، گلفام،زینت،باجی ، اناڑی اور کچھ دل نے کہا  شامل ہیں۔ایس سلیمان کی دیگر فلموں میں اف یہ بیویاں، محبت، آگ، جیسے جانتے نہیں، لوری، تیری صورت، میری آنکھیں اور انسانیت بھی شامل ہیں۔ بطور ہدایت کار ان کی آخری ریلیز شدہ فلم ویری گڈ دنیا ویری بیڈ لوگ تھی، جو 1998 میں ریلیز ہوئی، 2004 میں ذاتی ڈرامہ سیریل انا کی ڈائریکشن دی، جسے ملک بھر میں بے حد پسند کیا گیا۔ اس کے بعد ان کی ڈائریکشن میں 2006 میں ’کچھ دل نے کہا‘ ٹی وی سے پیش کیا گیا۔

لیجنڈری ڈائریکٹر کو حکومت پاکستان کی جانب سے ستارہ  امتیاز اور پرائڈ آف پرفارمنس ایوارڈ سے بھی نوازاجاچکا  ہے۔ انہوں نے 10 نگار ایوارڈز  کے ساتھ کئی  قومی اور بین الاقوامی  ایوارڈز بھی اپنے نام  کیے ۔ ایس سلیمان پاکستانی فلم انڈسٹری کا قیمتی اثاثہ تھے ،  ان کا  نام پاکستانی  فلمی  انڈسٹری  کا ایک کامیاب اور سنہرے دور کے حوالے سے ہمیشہ یاد رکھا جائے گا۔