پنجاب اور خیبرپختونخوا میں عام انتخابات کی تاریخ کے حوالے سے از خود نوٹس پر سماعت

اسلام آباد: سپریم کورٹ  چیف جسٹس معمر عطاء بندیال نے پنجاب اور خیبرپختونخوا میں عام انتخابات کی تاریخ کے حوالے سے از خود نوٹس پر سماعت کرتے ہوئے کہا کہ آج مختلف فریقین کو عدالت میں دیکھ کر خوشی ہورہی ہے۔

پیپلز پارٹی کے وکیل فاروق ایچ نائیک نے 2 ججز پر اعتراض اٹھاتے ہوئے کہا کہ ہمیں جسٹس اعجاز الاحسن اور جسٹس مظاہر علی اکبر نقوی کے بینچ میں شامل ہونے پر اعتراض ہے۔

فاروق نائیک نے کہا کہ ججز سے کوئی ذاتی خلفشار نہیں، جو ہدایات ملیں وہ سامنے رکھ رہا ہوں، ہدایات ہیں کہ جسٹس اعجازالاحسن اور جسٹس مظاہر نقوی بینچ سے الگ ہوجائیں۔

چیف جسٹس نے کہا کہ پہلے سب کی حاضری لگائیں گے، پیر کو سب کو سنیں گے۔

پی ڈی ایم کا مشترکہ تحریری بیان:

پی ڈی ایم جماعتوں کا مشترکہ تحریری بیان عدالت میں پڑھ کر سنایا جس میں کہا گیا کہ جسٹس مظاہرنقوی اور جسٹس اعجازالاحسن پہلے ہی غلام محمود ڈوگرکیس میں اس معاملے کو سن چکے،  استدعا ہے دونوں جج صاحبان خود کو ازخود نوٹس سے الگ کرلیں۔