تیسرا ٹی ٹوئنٹی ، پاکستان نے جنوبی افریقہ کو 9 وکٹوں سے ہرا دیا

پاکستان اور جنوبی افریقہ کے درمیان کھیلے جانے والے تیسرے ٹی ٹوئنٹی میچ میں  پاکستان نے جنوبی افریقہ کو 9  وکٹوں سے شکست دے دی،  پاکستان نے پہلی بار ٹی ٹونٹی فارمیٹ میں 200 رنز سے زائد کے ٹارگٹ کا کامیاب تعاقب کیا۔

پاکستان کی جانب سے بابر اعظم  122  رنز کیساتھ ٹاپ سکورر رہے،  بابر اعظم اور محمد رضوان نے ٹی ٹوئنٹی کرکٹ کی چوتھی بڑی شراکت قائم کی۔ بابر اعظم اور محمد رضوان کے درمیان 197 رنز کی پارٹنر شپ بنی۔ بابر اعظم تینوں فارمیٹس میں سنچری کرنے والے پہلے کپتان بن گئے۔ محمد رضوان 73 رنز بنا کر ناٹ آؤٹ رہے ۔

 پاکستان کو 4 میچوں کی سیریز میں 2-1 کی برتری حاصل ہوگئی۔

اس سے قبل  جنوبی افریقہ نے پاکستان کو جیتنے کیلئے 204 رنز کا ٹارگٹ دیا تھا،  جنوبی افریقہ نے 20 اوورز میں 5 وکٹوں پر  203 رنز بنائےتھے ۔

جنوبی افریقہ کی جانب سے  اوپنر آئیڈن مارکرم 63 رنز اور جے ملان 55 رنز کیساتھ نمایاں رہےتھے ۔ پاکستان کے محمد نواز نے 2، فہیم اشرف، شاہین آفریدی اور حسن علی نے 1،1 وکٹ لی تھی۔

پاکستان نے ٹاس جیت کر جنوبی افریقہ کے خلاف باؤلنگ کا فیصلہ کیا تھا،پاکستان ٹیم میں 3 تبدیلیاں کی گئی تھیں ،شرجیل خان، محمد حسنین اور عثمان قادر ڈراپ کر دیئے گئے جبکہ  فخر زمان، حارث رؤف اور آصف علی کی پلیئنگ الیون میں شمولیت ہوئی تھی۔