کل سپریم کورٹ میں ٹی ایل پی کے خلاف ریفرنس دائر کریں گے: شیخ رشید

وزیر داخلہ شیخ رشید اور وزیر مذہبی امور نورالحق قادری نے اسلام آباد میں پریس کانفرنس کی، اس موقع پر شیخ رشید کا کہنا تھا کہ ہم نے پوری کوشش کی کہ بات چیت سے مسئلے حل ہوں تاہم ان کے ارادے بہت خطرناک تھے اور وہ اپنے ایجنڈے سے پیچھے ہٹنا نہیں چاہتے تھے، میں دو سالوں سے مسلسل ٹی ایل پی سے رابطے میں رہا، مگر ٹی ایل پی فیض آباد آنے پربضد تھی۔

پولیس اہلکاروں نے جانوں کا نذرانہ دے کر امن کو یقینی بنایا، 580 پولیس والے زخمی ہیں۔پنجاب پولیس،  رینجرز کو خراج تحسین پیش کرتا ہوں ۔

شیخ رشید کا کہنا تھا کہ ٹی ایل پی پر پابندی کے حوالے سے  اٹارنی جنرل اس وقت بیٹھے ہوئے ہیں جلد دستخط کے بعد نوٹیفکیشن جاری کردیا جائے گا۔کابینہ نے تحریک لبیک پر پابندی کی منظوری دی، کچھ ہی دیر میں نوٹیفیکیشن بھی جاری ہوجائے گا جب کہ کل سپریم کورٹ میں ٹی ایل پی کے خلاف ریفرنس بھی دائر کردیں گے۔اب صرف لاہور کے یتیم خانہ چوک کے علاوہ پورا ملک کھلا ہوا ہے۔

وزیرمذہبی امور نورالحق قادری نے پریس کانفرنس میں کہا کہ دو سال کوشش کرتا رہا ہوں کہ ٹی ایل پی ریگولر سسٹم میں آئے، اسمبلی میں قرارداد کے حوالے سے ہم پیچھے نہیں ہٹے تھے تاہم حکومت قرارداد کا ایسا مسودہ لانا چاہتی تھی جس سے ہم پر سفارتی سطح پر کوئی اثر نہ پڑے۔ ایک ڈارفٹ ہمارا تھا اور ایک ڈرافٹ ٹی ایل پی کا تھا، ہم نے کہا تھا کے پارلیمانی کمیٹی سے ٹی ایل پی بات کرے، ریاستوں کا کام منتیں کرنا نہیں ہوتا، ہم نے مذاکرات کی بھرپور کوشش کی تھی۔