اب آنکھ کے اسکین سے کورونا وائرس کی تشخیص ممکن ، نئی ایپ تیار

غیر ملکی خبر رساں ادارے کے مطابق  میونخ کی ایک کمپنی  نے  آنکھ کے اسکین سے کورونا کی تشخیص کرنے والی ایپلی کیشن تیار کر لی ہے۔کمپنی کے مطابق  ان کے تیار کردہ ٹیسٹ میں آنکھ کو اسکین کیا جاتا ہے اور تین منٹ میں ٹیسٹ کے نتائج موصول ہوجاتے ہیں۔

سیمک آر ایف کمپنی کے منیجنگ ڈائریکٹر ولف گروہر نے کہا ہے کہ  اس اسکینگ ایپ کو  انہوں نے  اپنے کچھ ساتھیوں کے ساتھ مل کر تیار کیا ہے اور  بہت  پرامید ہیں کہ ایپ کو استعمال کرنے کی منظوری ملنے کے بعد وہ اسے آئندہ ماہ سے استعمال کے لیے فراہم کرسکیں  گے۔

ان کا مزید کہنا تھا کہ  اس ایپ میں اسمارٹ فون سے لی گئی آنکھ کی تصویر کو استعمال کیا جاتا ہے اور پنک آئی (علامتی سوزش) کے ذریعے وائرس کی تشخیص کی جاتی ہے۔ ولف گروہر نے بتا یا کہ ہم گلابی رنگ کے مختلف شیڈز میں سے کورونا وائرس  کی تشخیص کرسکتے ہیں۔

سیمک آر ایف کمپنی کے منیجنگ ڈائریکٹر ولف گروہر کا کہنا تھا کہ  اس ایپ میں 70 ہزار ٹیسٹ کیےجاچکے ہیں  اور یہ ایپ ایک سیکنڈ میں 10 لاکھ سے زائد اسکین پراسیس کرسکتی ہے۔ اس کے علاوہ  ایپ کو فٹبال میچوں اور کنسرٹ میں آنے والوں کی ٹیسٹنگ کیلئے بھی  استعمال کیا جاسکتا ہے۔