تھرپارکر: وزیرِ اعظم محمد شہباز شریف نے تھرپارکر میں کوئلے سے چلنے والے 1650 میگاواٹ بجلی کے 2 منصوبوں کا افتتاح کر دیا جس سے کوئلے سے پیداہونے والی بجلی کی پیداوار 3300 میگاواٹ ہو جائے گی۔

وزیراعظم محمد شہباز شریف نے اسلام کوٹ تھر کاایک روزہ دور کیا اور 330 میگاواٹ تھل نووا تھر اور 1320 میگاواٹ شنگھائی الیکٹرک منصوبوں کا افتتاح کیا۔

اس موقع پر وزیرِ خارجہ بلاول بھٹو زرداری، وفاقی وزرا چوہدری سالک حسین، احسن اقبال، انجینئر خرم دستگیر خان، مریم اورنگزیب، وزیرِ اعلی سندھ مراد علی شاہ، چینی نائب ناظم الامور پانگ چن شوئی اورسندھ کے وزیرِ توانائی امتیاز احمد شیخ بھی موجود تھے۔

یہ منصوبے 3.53 ارب ڈالر کی براہ راست غیر ملکی سرمایہ کاری سے تعمیر کئے گئے ہیں۔

وزیرستان: انٹر سروسز انٹیلی جنس (آئی ایس آئی) کے افسر بریگیڈیئر مصطفی کمال برکی نے جنوبی وزیرستان کے علاقے انگور اڈہ میں دہشت گردوں کے ساتھ مقابلے کی قیادت کرتے ہوئے جام شہادت نوش کیا۔

آئی ایس پی آر کے مطابق 7 فوجی زخمی ہوئے جن میں سے 2 کی حالت تشویشناک ہے۔

بریگیڈیئر برکی اور ان کی ٹیم نے مقابلے کے دوران دہشت گردوں کے خلاف دلیرانہ مزاحمت کی اور افسر نے مادر وطن کے امن کے لیے اپنی جان کا نذرانہ پیش کیا۔

یہاں یہ بات قابل ذکر ہے کہ پاکستان کی دفاعی افواج اور انٹیلی جنس ایجنسیاں ملک کے ہر انچ سے دہشت گردی کی لعنت کو ختم کرنے کے عزم کا اعادہ اور پختہ عزم کا اظہار کرتی ہیں۔

اسلام آباد: وزیر اعظم محمد شہباز شریف نے کہا ہےکہ بریگیڈیئر مصطفیٰ برکی اور دیگر سپاہیوں کی شہادت پر بہت دکھ ہوا ہے، ہمارے بہادر سپوتوں نے ملک دشمن قوتوں سے اپنے ملک کے تحفظ کے لئے اپنی جانوں کے نذرانے پیش کئے ہیں۔

بدھ کو اپنے ٹویٹ میں انہوں نے کہا کہ دہشت گردی کو جڑ سے اکھاڑ پھینکا جائے گا کیونکہ یہ پاکستان کے تصور کے خلاف ہے۔وزیر اعظم نے سوگوار خاندانوں سے تعزیت کی ہے۔