وفاقی کابینہ میں ردوبدل ، شوکت ترین نئے وزیرخزانہ مقرر

تفصیلات کے مطابق وزیراعظم عمران خان کی جانب سے وفاقی کابینہ میں بڑے پیمانے پر ردوبدل کی گئی ہے ،  شوکت ترین کو وفاقی وزیر برائے وزارتِ خزانہ و ریوینو کی ذمہ داری دینے کا فیصلہ کیا گیا ہے۔جس  کے بعد وہ  تقریباً پونے 3سال کے عرصے میں  پی ٹی آئی حکومت کی جانب سے مقرر ہونیوالے چوتھے  وزیر خزانہ   ہوں گے ۔

 موجودہ وزیر خزانہ اور وزیر صنعت و پیداوار حماد اظہر کو وزارت توانائی کا قلمدان سونپنے کا فیصلہ کیا گیا ہے۔ عمر ایوب سے وزیر توانائی کا چارج واپس لے لیا گیا اور انہیں وفاقی وزیر برائے اقتصادی امور بنا دیا گیا ہے ۔ شبلی فراز کو وزیر سائنس و ٹیکنالوجی کی ذمے داری دی گئی ہے، جبکہ خسرو بختیار وزیر صنعت و پیداوار کے فرائض سر انجام دیں گے۔ وزارت اطلاعات کا قلمدان فواد چودھری کو سونپا گیا ہے۔

خیال رہے کہ کابینہ میں ردِو بدل کی اطلاعات کافی عرصے سے زیر گردش تھیں اور گزشتہ روز سینیٹر فیصل جاوید نے ایک ٹوئٹر پیغام میں فواد چوہدری کو وزارت اطلاعات ملنے کی مبارکباد بھی دی تھی۔