آٹھ ماہ میں 6 لاکھ سے زائد افراد کو بیرون ملک بھیجا گیا، وفاقی وزیر سمندر پار پاکستانیز

وفاقی وزیر سمندر پار پاکستانیز ساجد طوری کہتے ہیں نوجوانوں کے بیرون ملک جانے کی وجہ خراب معاشی حالات نہیں بلکہ بہتر حکومتی پالیسیاں ہیں، آٹھ ماہ میں 6 لاکھ سے زائد افراد کو بیرون ملک بھجواچکے ہیں۔ انہوں نے انسانی اسمگلرز کیخلاف ایکشن کو غیرتسلی بخش قرار دے دیا۔

اسلام آباد میں میڈیا سے گفتگو کرتے ہوئے وفاقی وزیر سمندر پار پاکستانیز و قدرتی وسائل ساجد خان طوری نے کہا کہ گزشتہ آٹھ ماہ میں 6 لاکھ 54 افراد کو بیرون ملک بھجوا چکے ہیں، سمندر پار پاکستانیوں کے 27 ہزار پاسپورٹس کو بحال کیا جارہا ہے۔

ان کا کہنا ہے کہ غیرقانونی طریقے سے شہریوں کو بیرون ملک بھیجنے والے ملک کی بدنامی کا باعث بن رہے ہیں، انہوں نے انسانی سمگلرز کیخلاف ایف آئی اے کے ایکشن کو ناکافی قرار دے دیا۔

ساجد طوری نے کہا کہ انسانی اسمگلرز کیخلاف ایکشن سے مطمئن نہیں، اگر ایف آئی اے گرفتاری کرتی ہے تو انسانی اسمگلرز تھوڑے وقت کے بعد باہر آجاتے ہیں، پاکستان میں انسانی اسمگلنگ میں افعان ایجنٹ ملوث ہیں۔

وفاقی وزیر نے بتایا کہ غیرقانونی طریقے سے باہر جانیوالے 30 ہزار سے زائد پاکستانی یونان کی جیلوں میں ہیں، ہم جاپان اور آسٹریلیا کے ساتھ معاہدے کررہے ہیں، جس کے بعد بیروزگار نوجوان قانونی طریقے سے بیرون ملک جاسکیں گے۔