ٹویٹر بلیو ٹک حاصل نہ کرنیوالوں کی مشکلات میں اضافہ

سماجی رابطے کی ویب سائٹ ٹویٹر کو خریدنے کے بعد ایلون مسک مسلسل اس بات پر زور دے رہے ہیں کہ اس پلیٹ فارم کو بھی کمائی کا ذریعہ بنایا جائیگا، جس کے لیے انہوں نے گزشتہ سال اعلان کیا تھا کہ ٹویٹر پر بلیو ٹک حاصل کرنے والوں کو پیسے ادا کرنے ہوں گے۔

اب ایلون مسک نے اعلان کیا ہے کہ آنے والے دنوں میں پولز میں ووٹ کا حق صرف ٹوئٹر بلیو کے صارفین کو ہوگا۔ مگر عام صارفین کو زیادہ بڑا دھچکا ایک اور تبدیلی سے لگے گا جس کے باعث مستقبل قریب میں ٹوئٹر بلیو استعمال نہ کرنے والوں کی ٹوئٹس وائرل ہونے کا امکان ختم ہو جائے گا۔

ایلون مسک کی جانب سے ٹویٹر پر بتایا گیا کہ 15 اپریل کے بعد سے الگورتھم کی جانب سے تجویز یا ریکومینڈ کی جانے والی ٹوئٹس میں عام صارفین کے اکاؤنٹس کو مدنظر نہیں رکھا جائے گا۔ صرف ویری فائیڈ اکاؤنٹس کی ٹوئٹس ہی فار یو ٹیب میں دکھائی جائیں گی۔

ٹوئٹر میں فار یو ٹیب بنیادی طور کمپنی کے الگورتھم کی جانب سے تجویز کیے گئے مواد پر مبنی ہوتی ہے اور اس میں صارف کے اپنے فالوورز کی ٹوئٹس سے زیادہ دیگر ایسے اکاؤنٹس کو ترجیح دی جاتی ہے جو الگورتھم کے خیال میں صارف کو زیادہ دلچسپ محسوس ہو سکتے ہیں۔ تو اس نئی تبدیلی کے بعد عام صارفین کی ٹوئٹس کی ریچ (reach) محدود ہو جائے گی اور ان کی ٹوئٹس کا وائرل ہونے کا امکان نہ ہونے کے برابر ہوگا۔

ٹویٹر کو خریدنے والے مالک کا کہنا ہے کہ یہی حقیقی طریقہ ہے جس سے آرٹی فیشل انٹیلی جنس بوٹس کے غلبے کو روکا جا سکتا ہے