پاکستانی نامور گلوکار شوکت علی کو بچھڑے 2 سال بیت گئے

کھلی اور طاقتور آواز کے مالک فنکار گلوکار شوکت علی کو مداحوں سے بچھڑے دوسال ہوگئے۔ دنیا بھر میں پاکستان کی پہچان گلوکار شوکت علی نے ضلع منڈی بہاءوالدین کے علاقےملکوال میں 3 مئی 1944ء کو آنکھ کھولی۔  پانچ دہائیوں پر محیط اپنے موسیقی کے سفر کے دوران انہوں نے بے شمار اردو اور پنجابی گانے گائے۔ 

ایک ملی نغمہ ’جاگ اٹھا ہے سارا وطن‘ آج بھی ان کی پہچان ہے اور کئی گلوکار اسے کئی مرتبہ گا چکے ہیں۔ شوکت علی پہلی مرتبہ 1960 کی دہائی میں شہرت کی بلندیوں پر اس وقت پہنچے جب انہوں نے اس وقت کی مشہور فلم ’تیس مار خان‘ کے لئے اپنی آواز پیش کی۔

انہوں نے اپنا پہلا قومی نغمہ 28نومبر 1964ء کو پاکستان ٹیلی ویژن لاہور مرکز پر پیش کیا۔ یہ شوکت علی کا ہی نہیں بلکہ پاکستان ٹیلی ویژن کی تاریخ کا بھی پہلا قومی نغمہ ثابت ہوا۔شوکت علی نے 1965 اور 1971 میں پاکستان اور انڈیا کے درمیان ہونے والی جنگ کے دوران ملی نغمے بھی گائے، ان کے نغمے ’’جاگ اٹھا ہے سارا وطن‘‘ سن کر آج بھی جوش و ولولہ پیدا ہوجاتا ہے۔ 

لوک گلوکار شوکت علی کی خدمات کا اعتراف ان کی زندگی میں ہی کیا گیا اورانہیں کئی اعزازات سے نوازا گیا۔ حکومتِ پاکستان نے انہیں 1990 میں پرائڈ آف پرفارمنس کے اعزاز سے نوازا۔2اپریل 2021 کو77 سال کی عمر میں اس دنیا فانی سے کوچ کر گئے لیکن اپنے چاہنے والوں کے دلوں میں وہ آج بھی زندہ ہیں۔