لاہور میں پولیس اور رینجرز اہلکاروں کو اغواء کیا گیا ، چوہدری فواد حسین

وفاقی وزیر اطلاعات چوہدری فواد حسین نے مقامی میڈیا سے گفتگو کرتے ہوئے کہا ہے کہ  حکومت مذاکرات پر یقین رکھتی ہے لیکن بلیک میل نہیں ہوں گے،  لاہور میں پولیس اور رینجرز اہلکاروں کو اغواء کیا گیا جس پر آپریشن ہوا۔

وفاقی وزیر اطلاعات نے مزید کہا ہے کہ  ریاست کالعدم مسلح گروہ کے سامنے بلیک میل نہیں ہوئی، عمران خان عاشق رسول صلی اللہ علیہ وآلہ وسلم ہیں انہوں نے  ہر فورم پر بات کی ہے۔

 چند روز قبل  وزارت داخلہ نے تحریک لبیک پاکستان ( ٹی ایل پی) کو کالعدم قرار دے دیا تھا۔ وزارت داخلہ نے تحریک لبیک پاکستان پر پابندی کا نوٹیفکیشن جاری کردیا تھا۔ انسداد دہشت گردی ایکٹ 1997کے تحت تحریک لبیک پاکستان کو کالعدم قرار دیا گیا ہے۔

نوٹیفکیشن میں کہا گیا تھا کہ  تحریک لبیک پاکستان ملک میں دہشت گردی اور دوسرے گھناؤنے جرائم میں ملوث ہے۔ تحریک لبیک پاکستان  ملک میں لوگوں کواکسا کر انتشار پیدا کرنے میں ملوث ہے اس کے ساتھ ساتھ قانون نافذ کرنے والے اداروں کے اہلکاروں کی اموات اور زخمی کرنے میں بھی  ملوث ہے۔