ابوالحسن علیؑ ابن ابی طالب کا یوم شہادت آج عقیدت و احترام سے منایا جارہا ہے

لاہور میں یوم شہادت حضرت علیؑ کے سلسلہ میں مرکزی جلوس مبارک حویلی سے برآمد ہوا۔

اہل بیعت سے اپنی عقیدت اور محبت کا اظہار کرتے ہوئے اعزاداران نوحہ خوانی، ماتم، کرتے اپنی منزل کی جانب جلوس کے ہمراہ رواں دواں ہیں۔

جلوس کے شرکاء نماز ظہرین سنہری مسجد کے سامنے ادا کی جائیگی بعد اذاں سوناراں والا بازار، حکیماں والا بازار اور بھاٹی چوک پہنچ کر غروب آفتاب کے وقت کربلا گامے شاہ اختتام پزیر ہوگا۔

ملک کے بیشتر شہروں کی طرح لاہور میں بھی سکیورٹی کے انتظامات کیے گئے ہیں، جلوس کے راستوں پر خاردار تار اور کنٹینر لگا کر جلوس میں آنے والوں کی سکیورٹی کو یقینی بنایا گیا ہے۔

جلوس اور اس کی جانب جانے والے راستوں کی سیف سٹی کیمروں سے مانیٹرنگ بھی کی جارہی ہے، سرویلینس وینز بھی موجود ہیں۔

دوسری جانب کراچی میں حضرت علی کرم اللہ وجہہ الکریم کی شہادت کے موقع پر جلوس دوپہر ایک بجے نمائش چورنگی سے برآمد ہوگا اور اپنے مقررہ راستوں سے ہوتا ہوا حسینیہ ایرانیہ میں اختتام پزیر ہوگا۔ 

مرکزی مجلس نشتر پارک میں منعقد کی جاتی ہے مجلس سے خطاب علامہ امین شہیدی کریں گے، مجلس کے بعد یہ جلوس 1 بجے ننشتر پارک سے برآمد ہوگا۔

اس حوالے سے ہمیشہ کی طرح جلوس کے راستوں میں سکیورٹی کے انتظامات کیئے گئے ہیں، پانچ ہزار سے زائد رینجرز اور پولیس اہلکاروں کو تعینات کیا گیا ہے۔

جبکہ جلسوس کی گزر گاہوں میں بم ڈسپوزل سکوارڈ کے ذریعے سے اس کی سویپنگ بھی کرائی گئی ہے، راستہ میں بلند بالا عمارتوں پر سنائپر شوٹرز بھی تعینات کیئے گئے ہیں۔

جلوس میں آنے والے تمام شرکاء کی تلاشی کیلئے واک تھرو گیٹس اور میٹل ڈیٹکٹر کی سہولت کے ساتھ اہلکار تعینات ہیں جبکہ خواتین کی تفتیش کے لئے لیڈی پولیس اہلکار بھی موجود ہیں، جلوس کی جانب آنے والے راستوں کو کنٹینر لگا کر بند کردیا گیا ہے۔