رہنما پاکستان تحریک انصاف و سابق صدر مملکت ڈاکٹر عارف علوی نے حکومت کو کڑی تنقید کرتے ہوئے کہا کہ بانی چیئرمین پی ٹی آئی عمران خان بھاری مینڈیٹ لینے کے باوجود جیل میں ہیں

پارٹی رہنماؤں کے ہمراہ پریس کانفرنس کرتے ہوئے سابق صدر ڈاکٹر عارف علوی کا کہنا تھا کہ موجودہ پارلیمان فارم 47 سے بنی ہے اس کے پاس مینڈیٹ کم ہے، بانی پی ٹی آئی بھاری مینڈیٹ لینے کے باوجود جیل میں ہیں، اگر فارم 47 والی حکومت چلتی رہی تو حالات مزید خراب ہوں گے۔

انہوں نے کہا کہ جمعرات کو بانی پی ٹی آئی سے ملاقات ہوئی، ان کی صحت اچھی ہے اور وہ اچھے موڈ میں تھے، بات چیت ہی ملکی مسائل کا حل ہے، میں پل کا کردار ادا کرتا رہا ہوں ،میں بات چیت کے لیے کوشش کرتا رہوں گا، ناکامی تب ہو گی جب ناکامی مان لوں گا۔

سابق صدر کا کہنا تھا کہ فوج میری ہے میں نے ہمیشہ اس کا دفاع کیا اور کرتا رہوں گا، ہمارے تمام ادارے اس بند گلی میں چلے گئے ہیں، پاکستان کو اس وقت انویسٹمنٹ کی ضرورت ہے، سعودی عرب سے جو وفد آیا اس سے فائدہ ہو گا۔

ڈاکٹرعارف علوی نے کہا کہ میڈیا آزاد ہے تو لوگوں کو پتہ چل رہا ہے دنیا میں کیا ہو رہا ہے، غزہ میں سوشل میڈیا پر تصویروں سے پتا چلا کتنا ظلم ہو رہا ہے، میڈیا کی آزادی پاکستان کے لیے اہم ہے، پاکستان واحد ملک ہے جس میں سوشل میڈیا کو بند کیا گیا، سوشل میڈیا عوام کے ہاتھ میں ہے جس سے افواہیں پھیلتی ہیں۔ 

بلوچستان کےامیر جماعت اسلامی حافظ نعیم الرحمان نے کہا ہے کہ وزیراعلیٰ بلوچستان کو زمینداروں کے مسائل حل کرنے کی ضرورت ہے،بلوچستان میں بجلی کا بحران حل ہونا چاہیے۔

کوئٹہ میں زمیندار ایکشن کمیٹی کے دھرنے سے خطاب کرتے ہوئے امیر جماعت اسلامی حافظ نعیم الرحمان نے کہا ہے کہ دھرنے میں موجود شرکاء کو خراج تحسین پیش کرتا ہوں، بلوچستان سے مختلف پھل ملک بھر میں بھجوائے جاتے ہیں، حکومت سے مطالبہ ہے بجلی کی لوڈ شیڈنگ ختم کی جائے۔

انہوں نے کہا کہ وزیر اعلیٰ تو جج ہیں وہ وکیل کیوں بنیں ؟، وزیراعلیٰ کو زمینداروں کے مسائل حل کرنے کی ضرورت ہے، بلوچستان کے کاشتکاروں کو مقدمہ سامنے رکھنے پر خراج تحسین پیش کرتا ہوں، تمام کاشتکار بلوچستان اور پاکستان کے عوام کے حق کیلئے جدوجہد کررہے ہیں۔

حافظ نعیم الرحمان کا کہنا تھا کہ بلوچستان میں اس وقت ہزاروں ٹیوب ویل موجود ہیں،تقریبا ً 34اضلاع میں پانی کا نظام موجود ہی نہیں، یہ ٹیوب ویل محض 3گھنٹے چلیں گے تو کیسے زمین تیار ہوگی، ان ٹیوب ویلز پر یہاں کی معیشت کا انحصار ہے، ہمارا مطالبہ ہے بجلی کی فوری لوڈشیڈنگ کا سلسلہ ختم ہونا چاہیے، جن جماعتوں کی حکومت بلوچستان میں ہے انہی کی وفاق میں ہے۔

امیر جماعت اسلامی نے کہا کہ بلوچستان میں بے شمار وسائل ہیں، حکومت کو ٹیوب ویلز کیلئے سولر پینل کا انتظام کرنے کیلئے بھتے وصولی سے باز آنا چاہیے، حکومت ٹیوب ویلز کیلئے سولر پینل کا انتظام کرے، بجلی کی سپلائی کو ٹیوب ویلز کیلئے بڑھایا جائے۔

انہوں نے مزید کہا کہ یہاں گیس لوگوں کو دستیاب نہیں ہے،ایل این جی کے پلانٹ لگا کر ورچوئل پائپ لائن سے کام کرسکتے ہیں۔

لکی مروت میں سیکورٹی فورسیز اور پولیس کا مشترکہ آپریشن 36 گھنٹوں بعد مکمل ہوگیا، آپریشن کے دوران دو دہشت گرد ہلاک ہوئے جبکہ تین دہشت گردوں کے زخمی ہونے کی اطلاعات ہیں۔

لکی مروت پولیس اور سیکورٹی فورسیز کا 10 مئی کی شب 08 بجے شروع ہونا والا آپریشن جوکہ لکی مروت ڈیرہ اسماعیل کے ساتھ منسلک سرحدی پہاڑی سسلسلہ وانڈہ ظریف والا پہاڑ اور شیخ بدین کی پہاڑی سلسلہ میں دہشت گردوں کی موجودگی کی اطلاع پر شروع ہوا تھا، 36 گھنٹوں تک جاری رہنے کے بعد مکمل ہوگیا ہے۔

اس مشترکہ آپرہشن کے دوران دہشت گردوں نے پولیس اور سیکورٹی فورسیز پر خودکار ہتھیاروں سے فائرنگ کی، پولیس اور سیکورٹی فورسیز نے علاقے کو گھیرے میں لے کر سرچ آپریشن کیا جوکہ دو دن تک جاری رہا۔

آپریشن میں دو دہشت گرد ہلاک ہوئے جبکہ تین دہشت گردوں کے زخمی ہونے کی اطلاعات ہیں جن کی گرفتاری کے لیے علاقے میں سرچ آپریشن جاری ہے۔پولیس نے ہلاک دہشت گردوں سے بھاری مقدار میں اسلحہ، گولہ اور بارود بھی قبضے میں لے لی ہے، دونوں دہشتگردوں کا تعلق کالعدم تنظیم ٹی ٹی پی سے ہے۔

واضح رہے کہ ہلاک دہشت گرد ٹارگٹ کلنگ، بھتہ خوری، بم دھماکوں اور پولیس حملے میں بھی لکی مروت پولیس اور سی ٹی ڈی بنوں کو مطلوب تھے۔

اس موقع پر ڈی پی او لکی مروت نے کہا کہ شر پسندوں کے خلاف کارروائیاں جاری رہیں گی۔