پاکستانی اینی میٹڈ فلم ’اللہ یار اینڈ دی 100 فلاورز آف گاڈ‘ کا ٹریلر جاری

کراچی: پاکستانی اینی میٹڈ فلم ’اللہ یار اینڈ دی 100 فلاورز آف گاڈ‘ کا آفیشل ٹریلر جاری کر دیا گیا ہے۔

تفصیلات کے مطابق تھری ڈی اینی میٹڈ فلم عیدالاضحیٰ کے موقع پر ریلیز کی جائے گی، اس سے قبل 2018 کو پاکستان کی اینی میٹڈ فلم ’اللہ یار اینڈ دی لیجنڈ آف مارخور‘ ریلیز ہوئی تھی جسے کئی ایوارڈز جیتنے والی پہلی پاکستانی اینی میٹڈ فلم کے طور پر عالمی سطح پر متعارف کرایا گیا تھا۔

آئی ایم ڈی بی کی رینکنگ کے مطابق ’دی لیجنڈ آف مارخور‘ پہلی پاکستانی فلم تھی جو تین سال تک ٹاپ پر رہی جس کے بعد اسے پہلی پاکستانی فلم کے طور پر نیٹ فلکس پر بھی نشر کیا گیا۔

لیجنڈ آف مارخور کی ریلیز کے پانچ سال بعد اس فلم کا ایک اور سیکوئل ’اللہ یار اینڈ دی 100 فلاورز آف گاڈ‘ بھی سینما گھروں میں پیش کیا جا رہا ہے جو مکمل طور پر پاکستان میں تیار کیا گیا ہے۔

اس سائنس فکشن فلم کی کہانی اللہ یار نامی لڑکے کی ہے جو اپنے سیارے کو ماحولیاتی تباہی سے بچانے کے لیے جدوجہد کر رہا ہے۔

فلم کے ٹریلر میں دکھایا گیا ہے کہ اللہ یار کو بچانے والے کے محافظ کے طور پر دکھایا گیا ہے جس میں اس کا کام ایک پھول کو جگانا اور اپنے والد کو بچانا ہے جس کے لیے وہ دیے گئے ٹاسک کو پورا کرنے کے لیے ایک نئی دنیا میں چلا جاتا ہے۔

فلم کے مختلف کرداروں کو پاکستان کے نامور اداکاروں نے آواز دی جن میں ہمایوں سعید، اقرا عزیز، علی ظفر، میرا جی، بشریٰ انصاری اور اظفر جعفری شامل ہیں۔

اس سے قبل یہ فلم 2 جون کو ریلیز ہونی تھی تاہم اب اسے عیدالاضحیٰ کے موقع پر ریلیز کیا جا رہا ہے۔