زمبابوے نے ایک روزہ کرکٹ کی تاریخ کی دوسری بڑی فتح اپنے نام کرلی

انٹرنیشنل کرکٹ کونسل (آئی سی سی) ورلڈ کپ کوالیفائر میچ میں زمبابوے نے ایک روزہ کرکٹ کی تاریخ کی دوسری بڑی فتح اپنے نام کرلی۔

ہرارے میں زمبابوے اور امریکہ کے درمیان کھیلے گئے آئی سی سی کوالیفائر میچ میں میزبان ٹیم نے 304 رنز کے بہت بڑے مارجن سے فتح حاصل کی۔

زمبابوے نے پہلے بیٹنگ کرتے ہوئے مقررہ 50 اوورز میں 6 وکٹوں پر 408 رنز بنائے، کپتان سین ولیمز نے 174 رنز کی برق رفتار اننگز کھیلی۔

سین ولیمز نے اپنی اننگز کے دوران 101 گیندوں کا سامنا کیا، انہوں نے اس دوران 21 چوکے اور 5 چھکے لگائے۔دوسری جانب ہدف کے تعاقب میں امریکا کی ٹیم 104 رنز پر ڈھیر ہوگئی، یوں زمبابوے 304 رنز کے بڑے مارجن سے فتحیاب قرار پائی۔

ایک روزہ کرکٹ میں سب سے بڑی فتح بھارت کے نام ہے، رواں برس کے آغاز میں اُس نے سری لنکا کو 317 رنز سے شکست دی تھی۔

اس میچ میں بھارت نے ویرات کوہلی کے شاندار 166 رنز کی بدولت 390 اسکور بورڈ پر سجائے تھے، جواب میں سری لنکن ٹیم صرف 73 رنز پر پویلین لوٹ گئی تھی۔