وائٹ ہائوس کی پاکستانی نژاد امریکی صحافی سبرینا صدیقی کی آن لائن ہراسگی کی مذمت

وائٹ ہائوس نے پاکستانی نژاد امریکی صحافی سبرینا صدیقی کی آن لائن ہراسگی کی مذمت کی ہے جنہوں نے گزشتہ ہفتے بھارتی وزیراعظم نریندر مودی کے وائٹ ہائوس کے دورے کے دوران اُن سے ہندو قومیت کی حکومت کا اِنسانی حقوق کے ریکارڈ کے بارے میں پوچھا تھا، وائٹ ہائوس کی قومی سلامتی کونسل کے ترجمان جان کربی نے کہا ہے کہ وہ صحافیوں کی ہراسگی کی رپورٹوں سے آگاہ ہیں۔

انہوں نے کہا کہ یہ بات ناقابل قبول ہے اور وہ کسی بھی حالات میں، دنیا کے کسی بھی خطے میں صحافیوں کی ہراسیت کی مذمت کرتے ہیں، مودی کے حامی بھارتی باشندوں کی آن لائن ہراسگی کا حوالہ دیتے ہوئے کربی نے کہا کہ گزشتہ ہفتے مودی کے سرکاری دورے کے دوران جس بات کا مظاہرہ کیا گیا وہ جمہوری اصولوں کے منافی ہے۔

ادھر جنوبی ایشیاء کے صحافیوں کی تنظیم ساؤتھ ایشین جرنلسٹ ایسوسی ایشن نے سبرینا صدیقی کی حمایت بھی کی ہے جنہیں بھارت میں مودی کے پیروکاروں کی طرف سے آن لائن ہراساں کیا گیا۔سبرینا صدیقی صف ِ اوّل کے امریکی معاشی اخبار دی وال سٹریٹ جنرل کے نمائندہ کے طور پر کام کرتی ہیں۔