ایران کے ساتھ کوئی نیا جوہری معاہدہ زیرغور نہیں ہے،امریکی وزیر خارجہ

امریکا کے وزیر خارجہ انٹونی بلنکن کا کہنا ہے کہ ایران کے ساتھ کوئی نیا جوہری معاہدہ زیرغور نہیں ہے۔

نیویارک میں کونسل برائے خارجہ تعلقات میں خطاب کرتے ہوئے کہا کہ ایران کے ساتھ جوہری پروگرام کے حوالے سے کوئی معاہدہ طے نہیں ہوا ہے جبکہ ہم سفارتی راستے تلاش کرنے کے لیے تیار ہیں۔

غیر ملکی خبر رسان ایجنسی کے مطابق بلینکن نے ایران سے مستقبل کے تعلقات کے بارے میں کہا ہم ایران کے اقدامات کو دیکھیں گے۔ انھوں نے ایران پر زور دیا کہ وہ امریکا اور مشرق اوسط میں کشیدگی کو مزید بڑھانے والے اقدامات سے گریز کرے۔

سفارت کاروں کا کہنا ہے کہ حالیہ مہینوں میں عمان میں امریکا اور ایران کے درمیان خاموشی سے بالواسطہ مذاکرات دوبارہ شروع ہوئے ہیں۔ ان میں زیادہ تر توجہ ایران میں امریکی قیدیوں کی حیثیت اور رہائی پر مرکوز ہے۔

واضح رہے کہ امریکا اور ایران کے درمیان یورپی یونین کی ثالثی میں ہونے والے مذاکرات ناکام ہوچکے ہیں۔2015ء میں طے شدہ جوہری معاہدے کی بحالی کے لیے بات چیت مختلف متنازع امور پر ختم ہو گئی تھی۔امریکا نے ایران سے سابق صدر ڈونلڈ ٹرمپ کی جوہری معاہدے سے دستبرداری کے ردعمل میں کیے گئے جوابی اقدامات سے واپسی کا مطالبہ کیا تھا۔

بلینکن کا کہنا تھا کہ بائیڈن انتظامیہ نے یورپی طاقتوں کے علاوہ اپنے حریفوں چین اور روس کے ساتھ مل کر جوہری معاہدے میں واپسی کے لیے نیک نیتی سے کوششیں کی ہیں اور ایک وقت میں ایسا ممکن دکھائی دے رہا تھا۔

انھوں نے کہا:’’ایران یا تو وہ نہیں کر سکا یا نہیں کرے گا جو تعمیل میں واپس آنے کے لیے ضروری تھا‘‘