سرخ سیارے پر "چھوٹے ہیلی کاپٹر " کی تیسری کامیاب پرواز

جیٹ پروپلشن لیبارٹری ، ناسا کے مطابق   تیسری پرواز میں "انجینیٹی"  ہیلی کاپٹر 5 میٹر  کی بلندی تک پہنچا۔

25 اور 26 اپریل 2021 کی درمیانی رات ہونے والی اس تجرباتی پرواز میں " انجینیٹی" ہیلی کاپٹر  نے اضافی طور پر 50 میٹر  کا فاصلہ بھی طے کیا۔دوران پرواز  "انجینیٹی"  کی رفتار7.2 کلومیٹر فی گھنٹہ رہی۔

جیٹ پروپلشن لیبارٹری نے یوٹیوب پر انجینیٹی ہیلی کاپٹر کی تیسری تجرباتی پرواز کی ویڈیو بھی جاری کی ہے۔

ویڈیو میں " انجینیٹی"  ہیلی کاپٹر کو دائیں جانب پرواز کرکے کیمرے کی نظروں سے اوجھل ہوتے اور کچھ دیر بعد واپس اترتے دیکھا جاسکتا ہے۔

" انجینیٹی" ہیلی کاپٹر نے دوران پرواز نصب کیمرے سے ارد گرد کی کچھ تصویریں کھینچی ہیں ، ان  میں سے کچھ جیٹ پروپلشن لیبارٹری نے اپنی پریس ریلیز میں بھی شامل کی ہیں۔

آنے والے وقت میں انجینیٹی ہیلی کاپٹر کی آزمائشی پروازوں کے ذریعے  مریخ کے وسیع تر علاقے کا جائزہ لیا جائے گا۔

اس سے قبل دوسری پرواز میں "  انجینیٹی " ہیلی کاپٹر 16 فٹ کی بلندی تک پہنچا اور ایک جانب 7 فٹ ہٹنے کے بعد واپس اپنے پہلے مقام پر آگیا جبکہ پرواز مکمل ہونے پر وہ ٹھیک اسی جگہ دوبارہ اُترا کہ جہاں سے اس نے پرواز کی تھی۔