کورونا وباء ، ڈرائیونگ لائسینس کے اجراء پر تین ماہ کی پابندی عائد

آئی جی اسلام آباد قاضی جمیل الرحمان کی زیر صدارت اعلی سطح کا اجلاس ہوا، اجلاس میں ڈی آئی جیز، ایس ایس پی، اے آئی جیز اور زونل ایس پیز نے شرکت کی اور  اجلاس میں اہم فیصلے کیے گئے ہیں ۔کورونا وائرس کے باعث ڈرائیونگ لائسینس کے اجراء پر تین ماہ کی پابندی عائد کردی گئی۔پابندی کے دوران زائد المعیاد ڈرائیونگ لائسینس کا چالان نہ کرنے کی ہدایت کی گئی ہے۔

آئی جی اسلام آباد کا کہنا ہے کہ  ہنگامی صورتحال سے نمٹنے کیلئے سیف سٹی میں کنٹرول روم قائم کیا جائے، پولیس لائنز اور تھانہ جات کی سطح پر ڈس انفیشکن رومز قائم کیے جائیں۔ فرنٹ لائن پر موجود ڈاکٹرز اور پیرا میڈیکل سٹاف کو سیلیوٹ کیا جائے۔

آئی جی اسلام آباد کا مزید کہنا ہے کہ  ڈپلومیٹک انکلیو کے داخلی راستوں  پر مامور اہلکار کورونا حفاظتی کٹس کے استعمال کو یقینی بنائیں، ہنگامی صورتحال سے نمٹنے کے لیے آکسیجن و دیگر طبی آلات کی بروقت فراہمی کو یقینی بنایا جائے، مختلف سڑکوں ، چوکوں اور عوامی مراکز میں کرونا ایس او پیز پر عملدرامد کے لئے  آگاہی مہم چلائی جائے۔لوگوں کو ماسک پہننے اور سماجی فاصلہ رکھنے کی اپیل کی جائے۔پولیس کے تمام ڈویژنز آگاہی مہم میں بڑھ چڑھ کر حصہ لیں۔