کالعدم ٹی ایل پی نے پابندی ختم کرنے کے لیے وزارت داخلہ سے رجوع کر لیا

ذرائع کے مطابق ٹی ایل پی کو کالعدم قرار دینے کا معاملہ پر مذہبی جماعت ٹی ایل پی کے اعلی احکام نے پابندی کے فیصلے پر نظر ثانی کی درخواست دائر کر دی اور ٹی ایل پی نے پابندی ختم کرنے کے لیے وزارت داخلہ سے رجوع کر لیا۔

وزیر داخلہ شیخ رشید نے کل اجلاس طلب کر لیا، اجلاس میں کالعدم تحریک لبیک کی نظرثانی درخواست کا جائزہ لیا جائے گا۔

یاد رہے وزارت داخلہ نے پنجاب حکومت کی درخواست پر ٹی ایل پی کو کالعدم قرار دیا تھا۔

انسداد دہشت گردی ایکٹ 1997کے تحت تحریک لبیک پاکستان کو کالعدم قرار دیا گیا تھا۔

نوٹیفکیشن کے مطابق تحریک لبیک پاکستان ملک میں دہشت گردی اور دوسرے گھناؤنے جرائم میں ملوث تھی۔

نوٹیفکیشن میں کہا گیا تھا کہ ٹی ایل پی ملک میں لوگوں کواکسا کر انتشار پیدا کرنے سمیت قانون نافذ کرنے والے اداروں کے اہلکاروں کی اموات اور زخمی کرنے میں ملوث ہے۔

وفاقی وزیر داخلہ شیخ رشید نے14 اپریل کو پریس کانفرنس کرتے ہوئے  تحریک لبیک پر پابندی لگانےکا اعلان کیا تھا۔

وزارت داخلہ نے سمری انسداد دہشتگردی ایکٹ کے رول 11 بی کے تحت تیار کی، انسداد دہشتگردی ایکٹ 1997 کی شق 11 بی وفاقی حکومت کو کسی تنظیم کو کالعدم قرار دینے کا اختیار دیتی ہے۔