کالعدم تحریک لبیک کی نظر ثانی درخواست، حکومت کا کمیٹی تشکیل دینے کافیصلہ

تفصیلات کے مطابق وفاقی وزیر داخلہ شیخ رشید کی زیر صدارت کالعدم ٹی ایل پی سے متعلق   اعلی سطحی مشاورتی اجلاس ہوا جس میں  کالعدم تحریک لبیک پاکستان کی  نظر ثانی کی درخواست کا جائزہ بھی لیا گیا۔ ذرائع  کے مطابق وزارت داخلہ نے کالعدم ٹی ایل پی پر پابندی   کی درخواست پر نظر ثانی پر غور کرنے  کے لیے 3 رکنی کمیٹی تشکیل دینے کا فیصلہ کیا ہے جس میں وزارت داخلہ کے 2 جوائنٹ سیکرٹریز بھی کمیٹی کا حصہ ہوں گے۔ ذرائع کا کہنا ہے کہ کمیٹی میں وزارت داخلہ اوروزارت قانون کے حکام شامل ہوں گے‎ جبکہ کمیٹی نظرثانی درخواست کا جائزہ لے کررپورٹ پیش کرے گی۔

واضح رہےکہ گزشتہ روز  کالعدم تحریک لبیک نے پابندی کے خلاف حکومت کو  نظر ثانی کی درخواست دی ہے جس میں کہا گیا ہےکہ تحریک لبیک دہشتگرد تنظیم نہیں بلکہ الیکشن کمیشن میں رجسٹرڈ سیاسی جماعت ہے،  حکومت کی جانب سے نقص امن و کارسرکارمیں مداخلت کے ‏الزامات پر15 اپریل ‏کوتحریک لبیک پرپابندی عائد کی گئی، حکومتی اقدام حقائق کے منافی ہے، حکومت اپنے فیصلے پر‏نظرثانی کرتے ہوئے تحریک لبیک سے پابندی ہٹائے۔

 ملک میں حالیہ احتجاج اور دھرنوں کے بعد 14 اپریل کو  حکومت نے تحریک لبیک پر پابندی عائد کرکے اسے کالعدم قرار دیا تھا۔ وزارت داخلہ نے انسداد دہشت گردی ایکٹ 1997کے تحت  پنجاب حکومت کی درخواست پر ٹی ایل پی کو کالعدم قرار دیا تھا۔وزارت داخلہ نے سمری انسداد دہشتگردی ایکٹ کے رول 11 بی کے تحت تیار کی، انسداد دہشتگردی ایکٹ 1997 کی شق 11 بی وفاقی حکومت کو کسی تنظیم کو کالعدم قرار دینے کا اختیار دیتی ہے۔