فردوس عاشق نے بازار میں سب کے سامنے خاتون اسسٹنٹ کمشنر کو ڈانٹ پلادی

تفصیلات کے مطابق  وزیراعلیٰ پنجاب عثمان بزدار کی معاون خصوصی برائے اطلاعات ونشریات ڈاکٹر فردوس عاشق اعوان نے سیالکوٹ میں بازار کا دورہ کیا اور اس دوران انہوں نے  اشیائے ضروریہ کی قیمتوں کا جائزہ بھی لیا۔

فردوس عاشق اعوان نے  اسسٹنٹ کمشنر سیالکوٹ سونیا صدف  کو بازار میں سب کے سامنے ڈانٹتے ہوئے کہا کہ افسر شاہی کی کارستانیاں حکومت بھگت رہی ہے، آپ اے سی ہیں تو عوام کا سامنا کریں چھپ کیوں رہی ہیں؟۔ ان کا  کہنا تھاکہ ہر شہر کے رمضان بازار کا دورہ کیا مگر سب سے برا حال سیالکوٹ کا ہے، آپ کی حرکتیں ہی اسسٹنٹ کمشنر والی نہیں۔

ڈانٹ ڈپٹ کے دوران اسسٹنٹ کمشنر سونیا صدف غصے سے پنڈال سے باہر چلی  گئیں۔

اسسٹنٹ کمشنر سیالکوٹ سونیا صدف کا کہنا ہے کہ   فردوس عاشق اعوان کا رویہ نامناسب تھا،  گرمی کی وجہ سے پھل خراب بھی ہو سکتا ہے،  فردوس عاشق آرام سے بھی بات کر سکتی تھیں۔

اس واقعے کی ویڈیو بھی سوشل میڈیا پر وائرل ہونے کے بعد  صارفین کی جانب سے ملے جلے ردعمل کا اظہار کیا جارہا ہے۔

دوسری جانب    چیف سیکرٹری پنجاب جواد رفیق ملک نے سیالکوٹ کے واقعہ پر رد عمل دیتے ہوئے کہا ہے کہ   سیالکوٹ کے رمضان بازار میں انتظامی افسر  کے ساتھ غیر مہذب برتاو کی مذمت کرتے ہیں۔  اسسٹنٹ کمشنر سونیا صدف اور دیگر انتظامی افسران سخت گرمی اور کورونا کی وباء کے باوجود فرنٹ لائن پر موجود ہیں۔ کسی بھی سرکاری افسر یا عملے کے ساتھ غیر اخلاقی زبان استعمال کرنا قابل مذمت ہے۔

جواد رفیق ملک نے مزید کہا کہ   پنجاب بھر میں انتظامی افسران دن رات عوام کی سہولت کیلئے فیلڈ میں موجود ہیں جو قابل ستائش ہے۔  کسی کو یہ زیب نہیں دیتا کہ وہ سرکاری افسران کی تذلیل کرے۔  فیلڈ میں موجود تمام افسران کی انتھک محنت اور جرت کو سلام پیش کرتے ہیں۔ میں نے اس افسوسناک واقعہ کے حوالے سے تحفظات وزیر اعلی پنجاب تک پہنچا دئیے ہیں۔