جلیل عباس جیلانی نگران وزیر اعظم کے مضبوط امیدوار

نگران وزیراعظم کے مضبوط امیدوار ابھی وزیراعظم سے ملاقات کےلئے پارلیمنٹ ہاؤس پہنچ گئے۔

نگران وزیراعظم کیلئے سابق سیکرٹری خارجہ جلیل عباس جیلانی سب سے مضبوط امیدوار ہیں۔  جلیل عباس جیلانی وزیراعظم ہاؤس پہنچ چکے ہیں اور کچھ دیر بعد وزیراعظم سے ملاقات کریں گے۔ 

جلیل عباس جیلانی دو فروری سنہ 1955 میں پیدا ہوئے ۔ وہ آکسفورڈ یونیورسٹی سے قانون میں گریجویٹ ہیں اور ڈیفنس اینڈ اسٹریٹجک اسٹڈیز میں M.Sc کی ڈگری رکھتے ہیں۔اپنی پیشہ وارانہ زندگی کے دوران انھوں نے جنوبی ایشیائی امور میں مہارت حاصل کی اور  1992 سے  1995 تک محکمۂ خارجہ میں بھارت کے لیے ڈائریکٹر اور  1999 سے  2003 تک نئی دہلی میں پاکستان کے ڈپٹی اور نگران ہائی کمشنر رہے۔

2003 سے 2007 تک پاکستانی وزارتِ خارجہ میں جنوبی ایشیا اور سارک ممالک کے لیے ڈائریکٹر جنرل کے عہدے پر کام کرتے رہے اور سنہ 2005 میں انھوں نے دفترِ خارجہ کے ترجمان کی حیثیت سے بھی کام کیا۔دفترِ خارجہ کے مطابق جلیل عباس جیلانی  1983 سے  1985 تک جدہ،  1985 سے  1988 تک لندن، 1995 سے  1999 تک واشنگٹن میں تعینات رہے اور 2007 سے  2009 میں کینبرا میں پاکستان کے ہائی کمشنر کے عہدے پر فائز رہے۔

جلیل عباس جیلانی بھارت میں پاکستان کے ناظم الامور رہے ہیں  ‘ 2003 جنرل مشرف دور میں بھارت نے ناپسندیدہ شخصیت قرار دے کر بھارت چھوڑنے پر مجبور کر دیا تھا۔ جلیل عباس جیلانی رشتے میں یوسف رضا گیلانی کے عزیز اور بزرگ سیاست دان نواب زادہ نصرا للہ خان مرحوم کے نواسے بھی ہیں اور جسٹس ریٹائر تصدق جیلانی کے بھائی ہیں۔

جلیل عباس جیلانی نے امریکا سمیت متعدد ممالک میں پاکستان کے سفیر کی حیثیت سے خدمات انجام دینے کے بعد پاکستان کے سیکرٹری خارجہ کی حیثیت سے خدمات انجام دیں۔ ریٹائرمنٹ کے بعد انہوں نے پاک فضائیہ کے تھنک ٹینک سینٹر فار ایرو اسپیس اینڈ سیکیورٹی اسٹڈیز میں بھی کام کیا