معروف پنجابی گلوکار ٹریفک حادثے میں جاں بحق

پٹیالہ: بھارتی پنجاب کے مقبول گلوکار ہرمن سدھو ٹریفک حادثے میں جان کی بازی ہار گئے۔ 

تفصیلات کے مطابق حادثہ پٹیالہ منسا ہائی وے پر پیش آیا جہاں 37 سالہ  گلوکارکام سے گھر واپس جا رہے تھے۔

میڈیا رپورٹس کے مطابق حادثہ اس قدر شدید تھا کہ گاڑی بری طرح تباہ ہو گئی اور شناخت کے قابل بھی نہ رہی اور ہرمن سدھو موقع پر ہی دم توڑ گئے,پولیس نے حادثے کی وجوہات جاننے کے لیے باقاعدہ تحقیقات شروع کر دی ہیں۔

خیال رہے کہ ہرمن سدھو بھارتی پنجاب کے گھروں میں ایک جانی پہچانی آواز تھے،ان کی اچانک موت نے مداحوں اور ساتھی فنکاروں کو صدمے میں مبتلا کر دیاہے۔ 

ہرمن سدھو کو شہرت ان کے سپر ہٹ گانے ’Paper Ya Pyar‘ سے ملی جو انہوں نے مشہور گلوکارہ مس پوجا کے ساتھ گایا تھا، اسی گانے نے انہیں مین اسٹریم موسیقی میں جگہ دلائی اور ان کے کیریئر کے بڑے دروازے کھول دیئے،ہرمن سدھو کی کم عمری میں موت نے فنکار برادری کو شدید جھٹکا دیا ہے۔

دوسری جانب ان کے قریبی ساتھیوں کا کہنا ہے کہ وہ بہت محنتی تھے اور اپنے کیریئر کے بہترین دور میں تھے۔ہرمن سدھو کی موت کے بعد سوشل میڈیا پر تعزیتی پیغامات کا سلسلہ جاری ہے۔