ٹک ٹوکر حریم شاہ کے شوہر کے اغوا کے خلاف ایف آئی آر درج

کراچی: ٹک ٹوکر حریم شاہ کے شوہر بلال حسین شاہ کے اغوا کا مقدمہ کراچی کے ڈیفنس تھانے میں درج کرلیا گیا۔

سینئر سپرنٹنڈنٹ پولیس (ایس ایس پی) جنوبی کراچی شیراز نذیر کے مطابق، بلال شاہ کی والدہ بی بی شہزادی بیگم کی شکایت پر ڈیفنس تھانے میں فرسٹ انفارمیشن رپورٹ (ایف آئی آر) نمبر 533/23 درج کی گئی ہے۔

والدہ کے مطابق اس کے بیٹے بلال حسین کو 27 اگست کو کراچی کے علاقے قیوم آباد بلاک بی کی گلی نمبر 06 میں گھر سے نکلنے کے بعد اغوا کیا گیا تھا۔

ایف آئی آر میں بتایا گیا ہے کہ گھر سے نکلنے کے بعد بلال کو مین روڈ سے تین مختلف گاڑیوں میں نامعلوم افراد نے اغوا کر لیا۔

مدعی کے مطابق اغوا کار اس کے بیٹے کی گاڑی بھی اپنے ساتھ لے گئے اور بلال شاہ اب تک اہل خانہ سے رابطہ نہیں کر سکے۔ نامعلوم ملزمان کے خلاف ایف آئی آر درج کر لی گئی ہے۔

پولیس کا کہنا ہے کہ اس سلسلے میں تفتیش شروع کر دی گئی ہے۔

واضح رہے کہ حریم شاہ نے ایک ویڈیو بیان جاری کرتے ہوئے کہا تھا کہ ان کے شوہر بلال شاہ گزشتہ ہفتے لندن میں ان کے ساتھ تھے۔ جب وہ کراچی پہنچا تو اسے سادہ کپڑوں میں ملبوس لوگوں نے اٹھا لیا۔