مہوش حیات اور کبریٰ خان کے خلاف تمام سوشل میڈیا اکاؤنٹس کو بلاک کر دیا گیا ہے،انکوائری آفیسر

سندھ ہائی کورٹ میں سوشل میڈیا پر اداکارہ مہوش حیات اور کبریٰ خان کے خلاف قابل اعتراض مواد اپ لوڈ کرنے کے کیس کی سماعت ہوئی،عدالت کے طلب کرنے پر انکوائری آفیسر پیش ہوئے جنہوں نے عدالت کو بتایا کہ اداکاراؤں کے خلاف تمام سوشل میڈیا لنکس کو بلاک کر دیاگیا ہے

دورانِ سماعت ایف آئی اے کے تفتیشی افسر نے عدالت کو بتایا کہ  اداکارہ مہوش حیات نے چہرے کی شناخت کے لیے درخواست دی تھی اور  مہوش حیات کے مطابق ویڈیو میں نظر آنے والا چہرہ ان کا نہیں۔

تفتیشی افسر نے عدالت کو بتایا کہ سوشل میڈیا پر مہوش حیات اور کبریٰ خان کے خلاف تمام لنکس بلاک کردیے ہیں تاہم ٹوئٹر انتظامیہ کا تاحال جواب موصول نہیں ہوا۔

تفتیشی افسر نے عدالت کو بتایا کہ کراچی میں فارنزک ٹیسٹ کی سہولت موجود نہیں چنانچہ  اداکارہ کی درخواست پر ویڈیو اسلام آباد لیبارٹری بھیجی گئی ہے۔

سندھ ہائیکورٹ  نے ایف آئی اے حکام سے سوال  کیا اسلام آباد سے رپورٹ کب تک موصول ہوگی؟ اس پر ایف آئی اے کے وکیل نے کہا کہ فارنزک رپورٹ جمع کرانے کے لیے 4 ہفتوں کی مہلت دی جائے۔

عدالت نے ایف آئی اے کی جانب سے مہلت طلب کرنے پر سماعت چار ہفتوں تک ملتوی کر دی۔