سعودی عرب کی میزبانی میں یونیسکو عالمی ثقافتی ورثہ کا اجلاس

سعودی عرب یونیسکوکی عالمی ثقافتی ورثہ کمیٹی کے پینتالیسویں چیئرمین کی حیثیت سے الریاض میں ایک توسیعی اجلاس کی میزبانی کر رہا ہے۔عالمی ثقافتی ورثہ کمیٹی کا یہ اجلاس ہر چار سال کے بعد منعقد ہوتا ہے اور یہ 25 ستمبر تک جاری رہے گا۔

اس اجلاس کا آغاز الریاض میں واقع تاریخی المربع محل میں اتوار کو ایک شاندار تقریب سے ہوا۔اس کا موضوع ایک دُوراندیش کل کے لیے ایک ساتھ تھا۔ اس میں ثقافت اور ورثے کی حفاظت اور جشن منانے کی انتہائی اہمیت پر روشنی ڈالی گئی اور یہ کہا گیا کہ دنیا آگے بڑھ رہی ہے اور مستقبل کے چیلنجوں کو قبول کر رہی ہے۔

سعودی وزیر ثقافت اور سعودی قومی کمیشن برائے تعلیم، ثقافت اور سائنس کے چیئرمین شہزادہ بدر بن فرحان نے میزبان کی حیثیت سے سعودی عرب کے کردار پر فخر کا اظہار کیا۔انھوں نے کہا کہ مملکت کو عالمی ثقافتی ورثہ کمیٹی کے اس اجلاس کی میزبانی پر فخر ہے۔ثقافتی ورثہ سعودی عرب کی شناخت کا مرکز ہے اور قومی اور عالمی سطح پر متحد قوت کے طور پر کام کرتا ہے۔

انھوں نے کہا کہ اس اہم بین الاقوامی مکالمے میں مملکت کی فعال شرکت آنے والی نسلوں کے لیے ثقافت اور ورثے کے تحفظ کے لیے ہمارے غیر متزلزل عزم کی عکاسی کرتی ہے۔یونیسکو اور دیگر متعلقہ اداروں کے ساتھ شراکت داری میں ہم عالمی سطح پرپائیدار ترقی،اپنے مشترکہ ویژن کے اہداف کے حصول اورعالمی ثقافتی ورثے کے تحفظ کے لیے وسیع ترعالمی تعاون اور اجتماعی استعداد کار میں اضافے کی امید رکھتے ہیں۔

سعودی عرب کو اس کے شاندار ورثے اور متنوع ثقافت کی وجہ سے تسلیم کیا جاتا ہے۔اس وقت مملکت کے چھے مقامات یونیسکو کے عالمی ثقافتی ورثے میں شامل ہیں۔ ان میں آثار قدیمہ کا مشہور مقام الحِجر، الدرعیہ کا علاقہ الطریف، تاریخی شہرجدہ، حَائِل ریجن میں واقع راک آرٹ، الاحسَاء کا نخلستان اور حما کا ثقافتی علاقہ شامل ہیں۔ مزید برآں، سعودی عرب میں ایک اور مقام اس وقت کمیٹی کے رواں اجلاس میں ثقافتی ورثے میں شمولیت کے لیے زیرِغور ہے