اے این ایف کا منشیات اسمگلنگ کے خلاف 5 کاروائیوں کے دوران 183 کلو گرام سے زائد منشیات برآمد

اسلام آباد: اینٹی نارکوٹکس فورس (اے این ایف)نے منشیات سمگلنگ کے خلاف کاروائیوں 5 کاروائیوں کے دوران 183 کلو گرام سے زائد منشیات برآمد کر کے 8 ملزمان گرفتار کر لئے ہیں۔

ترجمان اے این ایف کی جانب سے جاری بیان کے مطابق موٹر وے ٹول پلازہ اسلام آباد کے قریب گاڑی سے 26کلو 400 گرام افیون اور 12کلو آئس برآمد کر کے دورانِ کارروائی مردان اور کشمیر کے رہائشی دو ملزمان گرفتار کر لئے ہیں۔ اسی طرح مدینہ چوک اٹک کے قریب رکشہ سے 27 کلو 600 گرام چرس برآمد کی ہے، اٹک کا رہائشی مُلزم منشیات رکشے کے خفیہ خانوں میں چھپا کر اسمگل کر رہا تھا۔

ترجمان کے مطابق ملیر کراچی کے قریب گاڑی سے 100 کلو 800 گرام چرس اور 30 بور پستول بمعہ ایمونیشن برآمد کر کے دورانِ کارروائی کراچی کا رہائشی مُلزم موقع پر گرفتار کر لیا گیا ہے۔ اے این ایف نے پنجاب رینجرز کے ساتھ باڈیاں چیک پوسٹ لاہور کے قریب مشترکہ کارروائی کے دوران دو گاڑیوں میں سوار لاہور اور خانیوال کے رہائشی 3 ملزمان گرفتار کئے ہیں، ملزمان کے قبضے سے 6 کلوگرام ہیروئن اور ایک عدد ہوائی ڈرون برآمد ہوا ہے۔

مزید برآں سونا خان چوک کوئٹہ کے قریب جیپ سے 11 کلو گرام چرس برآمد کر کے مستونگ کے رہائشی مُلزم کو منشیات کوئٹہ سمگل کرنے کی کوشش میں گرفتار کیا ہے۔ گرفتار ملزمان کے خلاف انسدادِمنشیات ایکٹ کے تحت مقدمات درج کر کے مذید تحقیقات کا آغاز کر دیا گیا ہے۔