قاہرہ میں پاکستانی سفارت خانے کے زیر اہتمام قوالی نائٹ، پاکستانیوں کی بڑی تعداد نے شرکت کی

قاہرہ: مصر کے دارالحکومت قاہرہ میں پاکستا نی سفارت خانے نے عیدمیلاد النبیﷺ اور پاک مصر سفارتی تعلقات کی 75 ویں سالگرہ کے موقع پر قوالی نائٹ کا اہتمام کیا۔

قاہرہ میں پاکستانی سفارت خانے کی طرف سے جاری بیان کے مطابق قاہرہ کے اوپیرا ہائوس میں منعقد ہونے والی اس تقریب میں بین الاقوامی سطح پر شہرت یافتہ پاکستانی قوال استاد فرید ایاز۔ ابومحمد اینڈ برادرز نے صوفیانہ کلام قوالی کی صورت میں پیش کرکے حاضرین سے زبر دست داد وصول کی۔

وہ ان دنوں سماع فیسٹول آف سپیریچوئل میوزک میں شرکت کے لئے مصر کے دورے پر ہیں۔

انہوں نے قوالی کے روایتی انداز اور جدت کے ملاپ سے تقریب کے شرکا کو مسحور کر دیا۔تقریب میں قاہرہ میں غیر ملکی سفارت خانوں کے عملہ کے ارکان، مصری حکام، مختلف شعبوں کے ماہرین اور مصر میں مقیم پاکستانیوں کی بڑی تعداد نے شرکت کی۔