آئی سی سی مینز ورلڈ کپ کا وارم اپ راؤنڈ کل سے شروع ہوگا

نئی دہلی: انٹرنیشنل کرکٹ کونسل کے زیر اہتمام 13 ویں آئی سی سی مینزون ڈے کرکٹ ورلڈ کپ سے قبل وارم اپ میچز رائونڈ کل (جمعہ ) سے شروع ہوگا۔

13ویں آئی سی سی مینز ورلڈ کپ کرکٹ ٹورنامنٹ کا آغاز آئندہ ماہ 5 اکتوبر سے ہوگا، جس کے تمام میچز ڈے اینڈ نائٹ ہوں گے ۔ میگا ایونٹ سے قبل ورام اپ رائونڈ میں ہر ٹیم دو، دو وارم اپ میچ کھیلے گی، وارم اپ رائونڈ میں کل جمعہ کو تین میچز کھیلے جائیں گے۔

پہلا وارم اپ میچ بنگلہ دیش اور سری لنکا کی ٹیموں کے درمیان گوہاٹی میں کھیلا جائے گا، دوسرے وارم اپ میچ میں جنوبی افریقا اور افغانستان کی ٹیمیں تھیرو وانا تھاپورام کے مقام پر پنجہ آزمائی کریں گی جبکہ تیسرا میچ پاکستان اور نیوزی لینڈ کی ٹیموں کے درمیان حیدر آباد کے مقام پر کھیلا جائے گا۔

پاکستان کی ٹیم اپنا دوسرا میچ آسٹریلیا کے خلاف 3 اکتوبر کو اسی مقام پر کھیلے گی۔ انٹرنیشنل کرکٹ کونسل (آئی سی سی) کے زیراہتمام آئی سی سی مینز کرکٹ ورلڈ کپ 5 اکتوبر سے19 نومبر تک بھارت کے 10 شہروں میں کھیلا جائے گا جس میں 10 ٹیمیں حصہ لیں گی۔

ٹورنامنٹ کے 45 لیگ میچز کے بعد چار ٹیمیں سیمی فائنل رائونڈ کے لئے کوالیفائی کریں گی ۔ میگا ایونٹ کا پہلا سیمی فائنل میچ 15 نومبر کو جبکہ دوسرا سیمی فائنل میچ 16 نومبر کو کھیلا جائے گا۔ میگا ایونٹ کی 2ٹاپ ٹیموں کے مابین فیصلہ کن معرکہ19 نومبر کو ہو گا۔