یواین چیف،صدرسلامتی کونسل کی مستونگ،ہنگومیں خودکش حملوں کی شدیدمذمت

اقوام متحدہ کے سیکرٹری جنرل انتونیو گوتریس نے مستونگ اور ہنگو میں دہشت گرد حملوں کی مذمت کی ہے اور اِن حملوں کے ذمہ داروں کو قانون کے کٹہرے میں لانے پر زور دیا ہے۔

نیویارک میں اقوام متحدہ کے ہیڈ کوارٹرزمیں معمول کی بریفنگ میں اظہار خیال کرتے ہوئے اقوام متحدہ کے سربراہ کے ترجمان STEPHANE DUTARRIC نے دہشت گردی کے اِن حملوں کی مذمت کی ہے جن میں 50 سے زیادہ افراد شہید ہوئے ہیں۔

انہوں نے کہا کہ یہ شہادتیں پُرامن مذہبی تقریبات کے دوران ہوئیں جو زیادہ سنگین واقعہ ہے، ادھراقوام متحدہ کی سلامتی کونسل نے مستونگ اور ہنگو میں سنگین اور بزدلانہ خودکش حملوں کی شدید مذمت کی ہے۔

یہ بات سلامتی کونسل کے صدر FERIT HOXHA کی طرف سے جاری کئے گئے ایک اخباری بیان میں کہی گئی ہے۔

سلامتی کونسل کے ارکان نے متاثرہ خاندانوں اور پاکستان کے ساتھ گہری ہمدردی اور تعزیت کا اظہار کیا اور زخمیوں کی جلد اور مکمل صحت یابی کیلئے نیک تمنائوں کا اظہار کیا۔

سلامتی کونسل نے ایک بار پھر کہا کہ ہر قسم کی دہشت گردی بین الاقوامی امن و سلامتی کیلئے ایک انتہائی سنگین خطرہ ہے۔

سلامتی کونسل کے ارکان نے دہشت گردی کے ان سنگین واقعات کے منصوبہ سازوں اور مالی معاونت کرنے والوں کو ذمہ دار ٹھہرانے اور انصاف کے کٹہرے تک لانے کی ضرورت پر زور دیا۔

انہوں نے ایک بار پھر اس ضرورت پر زور دیا کہ تمام رکن ممالک اقوام متحدہ کے چارٹر اور دوسرے بین الاقوامی قوانین کے تحت دہشت گردی کے واقعات سے عالمی امن و سلامتی کو درپیش خطرات سے نمٹنے کیلئے ہر طرح سے اقدامات کریں۔