غزہ میں جنگ پر یومیہ 24 کروڑ 60 لاکھ ڈالر خرچ کر ر ہے ہیں، اسرائیلی وزیر خزانہ

تل ابیب: اسرائیل غزہ میں جنگ پر یومیہ 24 کروڑ 60 لاکھ ڈالر خرچ کر رہا ہے ۔ یہ بات اسرائیلی وزیر خزانہ بیزالیل سموٹرچ نے اسرائیلی میڈیا سے بات چیت میں کہی۔

انہوں نے کہا کہ غزہ میں کارروائی کے لئے اسرائیل کے ریزرو فوجیوں کی بڑے پیمانے پرنقل و حرکت پر اٹھنے والے اخراجات اور حماس کے راکٹ حملوں نے اسرائیلی معیشت کو جزوی طور پر مفلوج کر دیا ہے اور اس کو پہنچنے والےبلا واسطہ نقصان کا فوری طور پر اندازہ لگانا مشکل ہے۔

اسرائیلی وزیر خزانہ نے عالمی ریٹنگ ایجنسی سٹینڈرڈ اینڈ پورز کی طرف سے اسرائیل کی ریٹنگ کو مستحکم سے منفی کرنے کو بھی ملکی معیشت کے لئے خطرناک قرار دیا۔ انہوں نے بینک آف اسرائیل کے سربراہ امیر یارون کی طرف سے عہدے سے سبکدوش ہونے کا فیصلہ واپس لینے کی بھی تعریف کی اور کہا کہ ملک کو درپیش بحران کی وجہ سے ان کا اپنی خدمات جاری رکھنا اسرائیل کے مفاد میں ہے۔