جعلی نوٹوں کو روکنے کے لیے پلاسٹک کرنسی کی سفارش

اسلام آباد: سینیٹ کی قائمہ کمیٹی برائے خزانہ نے جعلی کرنسی نوٹوں کی روک تھام کے لیے پلاسٹک کرنسی متعارف کرانے کی سفارش کردی۔

سینیٹ کی قائمہ کمیٹی برائے خزانہ کے اجلاس میں چیئرمین کمیٹی سلیم مانڈوی والا نے کہا کہ مارکیٹ میں جعلی نوٹوں کا رجحان عروج پر ہے۔ مارکیٹ میں 1000 روپے کے جعلی کرنسی نوٹ سب سے زیادہ استعمال ہوتے ہیں، وہ اے ٹی ایم مشینوں سے بھی نکل رہے ہیں۔

اس موقع پر کمیٹی کے رکن سینیٹر محسن عزیز نے کہا کہ 5000 روپے کے کرنسی نوٹ پر پابندی لگائی جائے کیونکہ اس سے بہت سی غیر قانونی سرگرمیوں پر قابو پانے میں مدد ملے گی۔

گورنر اسٹیٹ بینک آف پاکستان (ایس بی پی) جمیل احمد نے کمیٹی کو کرنسی نوٹوں کے سیکیورٹی فیچرز کو تبدیل کرنے کی یقین دہانی کرائی۔ انہوں نے کہا کہ اس سے جعلی کرنسی نوٹوں کو روکنے میں مدد ملے گی، انہوں نے مزید کہا کہ 'مستقبل میں پولیمر کرنسی نوٹ متعارف کرانے کا منصوبہ ہے'۔