افریقہ عالمی تجارت کا مستقبل ہے ، پاکستانی تاجروں کو افریقہ میں اپنی موجودگی بڑھانی چاہیے ،ایتھو پین سفیر

پاکستان میں ایتھوپیا کے سفیرجمال بکرعبد اللہ نے ہفتہ کو اسلام آباد چیمبرز آف کامرس اینڈ انڈسٹری کا دورہ کیا جہاں پر ایتھوپیا اور افریقہ میں غیر استعمال شدہ کاروبار، تجارت اور سرمایہ کاری کے مواقع پر روشنی ڈالی۔ان کی آمد پر اسلام آباد چیمبرز آف کامرس اینڈ انڈسٹری کی قیادت بشمول اس کے صدر احسن ظفر بختاوری نے ایتھوپیا کے سفیر کا پرتپاک استقبال کیا۔ اس موقع پر تاجروں کے اجتماع سے خطاب کرتے ہوئے ایتھوپیا کےسفیر نے کہا کہ پاکستانی تاجروں کو افریقہ میں اپنی موجودگی بڑھانی چاہیے۔

کیونکہ اس براعظم کی آبادی 1.4ارب سے زیادہ ہے اوریہاں پر سرمایہ کاری کے بے پناہ مواقع موجود ہیں۔ انہوں نے اس بات پر زور دیا کہ افریقہ عالمی تجارت کا مستقبل ہے اور پاکستانی تاجروں کی حوصلہ افزائی کی کہ وہ خود کو ان منافع بخش مواقع سے ہم آہنگ کریں۔انہوں نے بتایا کہ ایتھوپیا افریقہ کے لیے ایک گیٹ وے کا کام کرتا ہےجس سے کاروبار کے لیے پورے براعظم میں تجارت کرنا آسان ہو جاتا ہے۔

انہوں نے ایتھوپیا کی سب سے تیزی سے ترقی کرنے والی معیشت کے طور پر نمایاں حیثیت کو اجاگر کیاجو کہ 97 فیصد سے زیادہ صاف، سبز اور پائیدار توانائی ہائیڈرو، جیوتھرمل اور دیگر قابل تجدید ذرائع سے پیدا کرتا ہے جو اسے عالمی کاروباری افراد کے لیے سرمایہ کاری کی پناہ گاہ بناتا ہے۔ایتھوپیا کے سفیر نے پاکستانی سرمایہ کاروں کو ایتھوپیا کی حکومت کے مکمل تعاون کا یقین دلایا اور انہیں ملک میں مخصوص اقتصادی زونز کے قیام کی دعوت دی۔ انہوں نے پاکستانی تاجر برادری کی فعال کوششوں کو سراہتے ہوئے رواں سال کے شروع میں 75 سے زائد پاکستانی تاجروں بشمول اسلام آباد چیمبرز آف کامرس اینڈ انڈسٹری کے نمائندوں کے ایک اہم دورے کا حوالہ دیا۔

ایتھوپیا کے سفیر نے کہا کہ اس طرح کے دورے اہم ہیں۔ اسلام آباد چیمبرکے صدر احسن ظفر بختاوری نے گزشتہ ایک سال کے دوران ایتھوپیا اور پاکستان کے درمیان دوطرفہ تعلقات کو فروغ دینے میں سفیر جمال بکر عبداللہ کے فعال کردار کی تعریف کی۔انہوں نے ایتھوپیا کے لیے خاطر خواہ تجارتی وفد کو متحرک کرنے کے منصوبوں کا اعلان کیا۔ اس موقع پر ایتھوپیا کےسفیر نے اسلام آباد چیمبرز آف کامرس اینڈ انڈسٹری کے عہدیداروں کو ان کی مدت ملازمت میں توسیع پر مبارکباد بھی دی۔