ایران نے غزہ میں جنگ بندی نہ ہونے پر امریکہ کوسخت نقصان کی دھمکی 

ایرانی وزیر دفاع محمد رضا عشتیانی نے امریکہ کو انتباہ کیا ہے کہ اگر غزہ میں فوری جنگ بندی نہ کی گئی تو امریکہ کو سخت نقصان ہو گا۔ 

 ایرانی خبر رساں ادارے کی رپورٹ کے مطابق  ایران کے وزیر دفاع نے کہا کہ ہمارا امریکیوں کو مشورہ ہے کہ غزہ میں جنگ کو فوری روکے اور جنگ بندی کا نفاذ کریں بصورت دیگر وزیر دفاع نے دھمکی دی امریکہ سخت نقصان کا سامنا کرنا پڑے گا۔

واضح رہے ایران فلسطینیوں کا حامی ہے اور اسرائیل اسے حماس کا اسلحہ سپلائر اور مالی اعتبار سے سب سے اہم فنانسر سمجھتا ہے۔ ایران بھی امریکہ کو اسرائیل حماس جنگ میں شریک قرار دیتا ہے۔

قبل ازیں ایرانی وزارت خارجہ کے ترجمان ناصر کنعانی نے کہا تھا کہ اسرائیل امریکی حکومت کی مکمل حمایت کے ساتھ غزہ میں جنگی جرائم کا ارتکاب اور وہاں کے مکینوں کی نسل کشی کر رہا ہے۔

انہوں نے کہا کہ امریکا کی طرف سے اسرائیل کے مجرمانہ اقدامات کی مکمل حمایت امریکی قیادت کے متکبرانہ کی عکاس ہے۔

واضح رہے کہ امریکا نے اسرائیل اور حماس کے درمیان مکمل جنگ بندی کے مطالبے کو مسترد کرتے ہوئے اس کے بجائے اسرائیلی فوجی کارروائیوں میں انسانی ہمدردی کی بنیاد پر وقفے کی حمایت کی ہے۔

امریکی محکمہ دفاع نے اسرائیلی مسلح افواج کو اضافی ہتھیار بھی بھیجے ہیں اور اسرائیل کی حمایت میں مغربی بحیرہ روم میں بحری فوج بھی بھیج رکھی ہے۔